Friday 6 February 2009

تاج و واجب عليا :)

أولا أنا بشكر سووول على التاج دا مع انى بشوف ان الناس مش بتشكر فى الظروف اللى زى دى بتزعق :)
بس أنا هشكر بقا :)

ثانيا أسفة يا سولى ع التأخير معلش و الله بس أنا اليومين اللى فاتو أصلا ماكنتش بقعد فى البيت علشان كدا ماكنتش عارفة أتواصل خالص
ثالثا.. الاجابات بقا :)
السؤال الأول: ..
بدأتِ التدوين إمتى؟؟ ودخلتِ العالم ده إزاي؟؟
بدأت تدوين الصيف اللى فات :D
أولا كدا كنت بسمع عن المدونات فى البرامج التليفزيونية و بالذات برنامج شبابيك و عجبتنى الفكرة جدا لأنى من وأنا زقردة و عندى عشر سنين كنت أمسك الورقة و القلم و قال ايه بكتب سعر.. و قثة قثيرة.. ههههههه بس ماكنتش بردو عارفة البداية تيجى ازاى
و بعدين على أحد المنتديات المفضلة جدا جدا بالنسبالى تقريبا مش بدخلالا فيه و هو منتدى أى كلام فى موقع ايجى فيلم لقيت ناس كاتبين على المدونات بتاعتهم و قد ايه العالم دا جميل.. قولت مابدهاش بقا :D
بعت لأحد الأعضاء دول و هو الأستاذ صبرى سراج صاحب مدونة صمت البحر.. و قاللى أدخل فين و ازاى علشان أعمل بلوج.. و كانت دى البداية :)
السؤال التاني
إيه كان إنطباعك ف البداية؟؟
فى البداية كنت سعيدة جدا بالتدوين.. و كنت بكتب بحماس عالى أوى أوى.. و بعدين جيت شوية وقفت خالص.. لييييه؟ علشان القليلين اللى كانو بيردو عندى مش بقو يردو :(
قلت خلاص أكتب اللى انا عايزاه فى الأجندة بتاعتى و خلاص بقا
لازمتها ايه المدونة و محدش بيقراها.. و بعدين صاحبتى و حبيبتى سلمى عصام صاحبة مدونة NEW HOPE
عرفتنى أعمل ايه علشان أوصل صوتى للناس.. و قالتلى ادخلى من بلوج لبلوج لبلوج و اللى ماتعجبكيش و فيها أفكار وحشة ماتدخليهاش تانى.. و قد كان :)
و اتعرفت بالطريقة دى بجد على أحسن ناس
السؤال الثالث: مين أكتر حد بتحب تعليقه عـ البوست الجديد؟؟
و الله بفرح بأى تعليق عندى و فى أشخاص معينين بستنى ردهم مخصوص و بدخل ساعات مخصوص أشوف ليهم كومنت و لا لأ
بفرح جدا كمان لما أكسب مدون زائر جديد
السؤال الرابع: إيه أهــــم حاجة إتعلمتها في عالم التدوين؟؟
بجد التدوين ليه فضل كبير عليا فى زيادة مهارتى الأدبية .. مهارة ايه بس مش للدرجة دى هو انا عندى مهارة أصلا..ممممم قصدى قدرتى ع الكتابة يعنى.. معرفش بقا :d
كمان التدوين زود بشكل كبير من ثقافتى العامة و عرفنى على أفكار و أسلوب ناس مختلفة من كل الطبقات و دا عمل عندى حاجة حلوة أوى و توازن كبير
السؤال الخامس: إيه أكتر حاجة كرهتها؟؟
يعنى تعصب بعض المدونين لرأيهم بشكل كبير و عدم استعداد البعض لسماع أى فكرة مخالفة أصلا.. بس كدا
السؤال السادس: حاسس إن التدوين ليه تأثير؟
أكيييد طبعا :)
السؤال السابع: تهدي التاج لمين؟؟
فى ناس موصيانى كتير انى ماأهديلهاش أى تاج و الا هيزعلو :D
هو الناس مش بيحبو التاجات ليه.. دى حتة بتطلع حاجات حلوة من القلب
عموما... مممم بداية بهدى التاج لسلمى حبيبتى حياتى كلها لله
و لجنى مجدى الرقيقة
و مسدس صغير
و عاشقة الورد صدى الصمت
و promise is promise

متهيألى كفاية.. مش كدا و لا ايه ها :d
و الله يا سول لو ينفع أهديهولك و أرده تانى كنت عملتها
بس قريب ان شاء الله هعملك واحد اكسكلوسيف عشان خاطر عيونك
تحياتى :)

36 comments:

وردشان smilyrose said...

اول تعليق

يا سمر

يا اجمل اسكندرنياية

smilyrose

وردشان smilyrose said...

اولا احلى تاج لأحلى بنوتة

اجاباتك رائعة وربنا

يحقق كل احلامك يارب

ويزيد مهارتك الأدبية

اكتر واكتر ونسمع عن اديبة

جميلة مليئة بالاحساس

اختك

smilyrose

روح الحب الصادق

صدى الصمت - عاشقة الورد - said...

ايه دة ؟
أنا إسمى مكتوب وله إيه ؟؟؟
يا خبر يا سمورة ميرسى خالص بجد على الهدية الجميلة دى وأوعدك إنى هأجاوبة بس للأسف هتأخر شوية فى الرد لأن فيه تاج قبله وإتأخرت على ردة جداً عشان أحداث غزة والفلانتين وصاحبتة زعلانة منى جداً وكنت واعداها إنى هأرد عليه فى أقرب فرصة
أرجوكى ماتزعليش لو إتأخرت عليكى وأشكرك مرة تانية على الهدية
على فكرة إجاباتك جميلة قوى وصادقة
تحياتى

dr_samarmar said...

سمايلى روز

ربنا يكرمك و يخليكى يارب يارب يا جميل ميرسى أوى :)

حكاية أديبة بقا كان حلم قديييم بس خلاص :)

نورتينى و ربنا :)

dr_samarmar said...

صدى الصمت

العفو يا جميل على ايه بس:)

و الله دخلت كذا مرة فى البلوج عندك علشان أقولك ع التاج بس كل مرة بيعلق :$

فقولت شوية و أدخل تانى أبلغها بس سبقتينى

و ماتعتذريش يا قمر خدى وقتك و الله :)

تحياتى :)

مسدس صغير said...

اول تعليق
هااااااااااااااااااا
هههههههه كلام منطقى وعشان خاطرك هنرد على التاج بس هحاول اعمل كوكتيل مع تاج مشمشة

فشكووول said...

العزيزه سمرمر.. تحياتى
نفس التاج اهداته لى العزيزه سوول بس لسه ما جاوبتش عليه
الرد على سؤالك عن الاسباط
هما مش كانوا لسه عايشين .. بس كل واحد من اولاد سيدنا يعقوب كان سبط يعنى حاجه كدا زى راس عيله او قبيله .. وكل اسرائيلى بينتمى الى واحده من هذه القبائل .. يعنى فلان الفلانى يبقى من سبط سيندنا يوسف وفلان الفلانى من سبط سيدنا بنيامين وفلان الفلانى من عائلة سيدنا لاوى .. وهكذاحتى اليوم
تحياتى

مذكرات مشاغب said...

تاج جميل

dr_samarmar said...

مسدس

أول تعليق مرة واحدة :D

يا سيدى منور

و ميرسى ع الرد السريع دا :)

dr_samarmar said...

أستاذ فشكول

ما هو انا و الله أخدت بالى ان سول أهدته لحضرتك علشان كدا ماكانش ينفع أهديه لحضرتك انا كمان

بس مش مشكلة انا و هى واحد :)

و متشكرة أوى على توضيح حضرتك :)

تحياتى :)

dr_samarmar said...

مشاغب

ميرسى ع الرد أوى نورت :)

فتــافيت (رحاب الخضري) said...

حلوة اجاباتك اوي

ومدونة شكلها مدونة عسولة زيك

تقبلي مروري الاول على مملكتك

سلام يا جميل

romansy said...

تاجات تاجات

اسكندريه ماريا وترابها زعفران

ايه التاجات اللى جايه بريحه البحر الجميله دى
ربنا يحقق امنياتك واحلامك يارب

dr_samarmar said...

فتافيت

ميرسى ربنا يخليكى يا قمر

منورة و حياة ربنا.. و يارب تتكرر كتير الزيارة الجميلة دى :)

dr_samarmar said...

رومانسى

ميرسى على ردك الجميل

منوررر:)

البحر بردو فى الصورة الشخصية بتاعتك :)

تحياتى :)

عاشقه الرومانسيه said...

جميل التاج ياقمر
عقبال تاج الفرح

dr_samarmar said...

عاشقة الرومانسية

ميرسى يا جميل ربنا يخليكى :)

Beram ElMasry said...

الاخت العزيزة . dr_samarmar
السلام عليكم ورحمة الله وبركاته
ابنتى العزيزة ، اهلا بك ومرحبا بك ابنة وصديقة ومحاورة ذكية ، دخلت مدونتك للتعرف اكثرا فوجدت تاجا فهربت
ساخبرك بسر ارجو ان تكتمية ، وهو اننى لا اخاف العفاريت ولا الذئب ولا العقرب وقد لدغنى ثلاث مرات ، ولكن اخاف الانسان والاسانسير والتاج ، الانسان لانه سريع التقلب ومنه اليهودى وهو اخبث خلق الله ، والاسانسير لانه علبة مغلقه ومن بداخلها لا يملك زمامها وصار تحت رحمه انسان اخر ، والتاج لعبه خبيثة يستدرج بها الشباب الغر وهو اشبه بتاج الجزيرة ، وهى من مكائد العدو يعرف بها اسلوب الحياة وحدود المعرفة والطموحات ، انها دراسة كاملة لشعب عبيط دون تجسس

promise is promise said...

ردودك جميله جدا وصريحه خالص يادكتور
والف شكر على التاج
واسمحيلى اقولك ياسمرمر بس
واتشرف بيكى لو تقبلينى صديقه ليكى

dr_samarmar said...

الأستاذ بيرم المصرى

والتاج لعبه خبيثة يستدرج بها الشباب الغر وهو اشبه بتاج الجزيرة ، وهى من مكائد العدو يعرف بها اسلوب الحياة وحدود المعرفة والطموحات ، انها دراسة كاملة لشعب عبيط دون تجسس

بجد؟؟؟ هو الموضوع كبير أوى للدرجة دى!!!

شكرا على رد حضرتك و على مرورك جدا جدا :)

dr_samarmar said...

بروميس

ياسلام دا يشرفنى طبعا طبعا

و نورتى البلوج بردك الجميل
و العفو :)

تحياتى :)

فشكووول said...

بنتى الحبيبه د.سمرمر
متشكر يا سمرمر على الزياره .. والله يا سمرمر انا كنت بذاكر زى العيال اللى فى الجامعه وعمال افتح مراجع ومصادر وكتب كتيره قوى عندى واحاول اجمع المعلومه من كذا كتاب واضربهم لكم فى الخلاط عشان يطلع الموضوع بالصوره اللى انت قريتيها دى
تحياتى سمرمون .. بادلعك

حياتي كلها لله said...

السلام عليكم

أه يا بنتي أنا دايخة عليكي مش عارفة أوصلك خالص ...الموبايل مقفول علي طول و في البيت محدش بيرد خااالص أنا بجد قلقت عليكي جدا ..و خصوصا بعد الكومنت بتاعي عندك ممكن تكلمين ضروري بجد أنا بكرة إن شاء الله حروح رسالة ياريت أقدر أشفك هناك

طمنيني عليكي سلام يا جميل
سلاموكا

زمن الشيكابالالالا said...

جميل قوى التاج والمدونة كلها رائعة
تحياتى
دمت بكل الود والشيكابالا

Kiara said...

قمري

اجاياتك جميله

وحشاني اوي

علي فكرا انا كمان مش مع التعصب برغم اني حصبيه اووووووووووي

Anonymous said...

اول تعليق هنا

اسكندرانية يا بلدياتى

كده احنا على حسك تمام يا افندم

وامن المدونة مستتب

هاقرا وراجع تانى

احمد

Anonymous said...

جميل اوى تواضعك حتى اننى ارى تواضعك متواضع

ربنا يوفقك ان شاء الله


احمد


مواطن سكندرى

محمد سمير said...

اجابات جميلة جدا يا سمر
و منطقية

dr_samarmar said...

عمو فشكول

ربنا ان شاء الله يجازيك كل كل خير على مجهود حضرتك :)

بس احنا استفدنا بجد :)

dr_samarmar said...

سلمى انا بعتلك ع الموبايل مسج

كلمينى يابنتى فى البيت أنا موجودة مش بخرج

ماتقلقيش عليا يا حبيبتى :)

dr_samarmar said...

شيكابالا

ميرسى أوى أوى المدونة منورة بزيارتك :)

dr_samarmar said...

كيارا

ميرسى يا جميلة ربنا يخليكى يارب يارب

انتى الأجمل :)

منورانى

dr_samarmar said...

أسماء و أحلام فى وجدانى

أهلا أهلا بالاسكندرانيين :)
أيوة كدا عايزة المدونة تتملى اسكندرانية :)

ميرسى على ردك الجميل و منور البلوج

dr_samarmar said...

محمد سمير

شكرا يا محمد ربنا يخليك :)

gogo!sf said...

بجد كل البوستات بتاعتك رائعة وانا نفسي ارد عليها كلها بس مش عايزة ازعجك وارجعك للفات
وانتي عندك حق ما احنا كنا في حالنا وبعيد عن وجع القلب
بس من الواضح اننا بنحب ونموت في وجع القلب
اشكرك

gogo!sf said...
This comment has been removed by the author.