Thursday 25 June 2009

البقاء لله

أمس... توفى الى رحمة الله تعالى من أعتبره عمى.. خالى..

انه أكثر بكثير من أبا لصديقتى

انه عمر قضيناه انا و أسرتى بكل الود و الحب

انه والد أية صديقة عمرى

حزنى ليس فقط من أجل أية

و لكن من أجل فراقه.. و من أجل زوجته اللتى أعتبرها أكثر من خالة.. و بناته اللاتى أعتبرهن أخواتى
و من أجل أبى..الذى يعتبره أخا و يحبه و يوده

الوداع يا عمو صبحى و رحمك الله و أبدلك أهلا خيرا من أهلك و دارا خيرا من دارك

رحمك الله

Sunday 21 June 2009

سبهللة

واحد راكب أوتوبيس و الدنيا زحمة و فجأة عااااتشىىى (يعطس يعنى )و كح كح كح و ...... المهم يعنى لو هيعدى يبقى هيعدى لأوتوبيس كله

سبهللة

و طبعا بما ان زبالة كل الدول المجاورة و البعيدة مش بتلاقيلها مزبلة غير مصر فمن السهل جدا دخول شحنة قمح فاااااسد لمصر و من الصعب جدا ان مصرى واحد يتظاهر أو يشتم فى وزارة التجارة أو التموين

سبهللة

عادى جدا ان بلد كالصين تمنع دخول أى مكسيكى الى أضها لكن صعب جدا مصر تحط الوافدين من دول مصابة بوباء عالمى قاتل فى الحجر الصحى لمدة أسبوع واحد بس قبل ما يدخلو..و طبعا مافيش مصرى بيفتحبقو ماهى أصلها بقت

سبهللة

معظم شباب مصر يومهم خلال الأجازة الصيفية لا يتعدى لعب الكورة و الفرجة ع التليفزيون و القعدة ع النت و الخروج و التسبيل للبنات..مش لاقيين رادع
ماهى

سبهللة

أب يقتل مراته و عياله عشان فلوس

سبهللة

خال يغتصب بنت أخته

سبهللة

سبعين مليون واحد رافضين يقولو لأ و مصرين يمشو جنب الحيط

سبهللة

أم بتصلى كل الصلوات و مش بتقول لأبنها صلى و بتلبس لبس محتشم و مابتقولش لبنتها اختشى

سبهللة

أب بيشرب سجاير قدام ابنه و بيقوله اوعى دخن

سبهللة

بعض أعضاء حد الجمعيات الخيرية يزورو دار أيتام و يلعبو فيها مع بعض كووورة !!

سبهللة


أم سامحة لعيالها يقلو أدبهم عليها..أب يبصبص لبنات قد بناته قدامه ولاده..شاب مضيع فلوسه ع المخدرات..بنت كل حياتها تليفونات و هدايا فلانتاين..طالب بيذاكر بس و رافض يتكلم فى أمور و شئون بلده..شحاتين ماليين البلد و محدش قادر يمنعهم ..أطفال شوارع بتنحرف و حكومتنا سايبينهم .. ناس بترمى فضلاتها فى الشوارع..موظفين متكربسين فى مكاتب و أراشيف بيشربو شاى ورا قهوة من غير عمل..مدرس بيتهدد من طالب بقطع عيشه لو ماتعدلش معاه..دكتور بيسرق أعضاء.. صحفى بيرتشى..محامى فاسد معندوش ضمير..ظابط فى شكله و فى الأصل فتوة بيفترى على خلق الله.. استراتيجية وزارة التعليم المصرية هى حشو الدماغ

يا جماعة العيب بجد مش فى الحكومة أبدااااااا
العيب فينا احنا...فى الشعب...اللى راضى و مستسلم لعيشة

السبهللة

ياريت نتغير قبل ماغضب ربنا يحل علينا بجد و الضربة اللى تفوقنا تبقى فوق احتمالنا
و كفاية سبهللة

Monday 15 June 2009

خدنا أجاااااازة

الحمد لله خلصت

لسة خارجة من أخر امتحان الا و هو امتحان الفسيولوجى و ببعتلكم الرسالة دى و انا لسة فى الكلية
علشان بس أبقى وفيت بوعدى

وحشتوووونى أوى ووحشنى التدوين جدااااا

ربنا يوفق كل الطلبة يارب فى امتحاناتهم
عودة قريبة ببوست جديد ان شاء الله :)

Tuesday 5 May 2009

لسة ماسكاك يا قلم.. هفضل أكتبك يا فكرة.. يا ترى بتتحقق يا حلم؟

أيون أيون بالظبط... هو كدا بالظبط... بالمللى



عيد ميلاد البلوج :)



كدا عدت سنة ع المدونة و على علاقتى بالتدوين

عدت سنة على حاجة جميلة ف حياتى مقدرش أنكر جمالها

بجد انا بموت فى التدوين و المدونة و انكنت بنشغل عنهم كتير فى دراستى



بس خلاص هانت

الصيف قرب أهو

ان شاء الله لو كان ليا عمر و ماكنش وباء أنفلونزا الخنازير بينتقل عبر النت كمان هبقى ع المدونات بشارك كل يوم



الموضوع بدأ من سنة لما كنت بتفرج على مدونة صمت البحر.. و ابتديت أغير و ايدى نفسها تكتب.. قمت بقا ايه.. دخلت على انشاء مدونة الكترونية

و كتبت لا مؤاخذة :D



فى الاول كان العدد اللى بدخل مدوناتهم و بيدخلو مدونتى قليل جدا

و بعدين بدأت أتوسع بقا و أدخل مدونات كتير

منها اللى عجبنى و منها اللى مشدنيش

لكن الحمد لله اللى عجبونى أكتر بكتييييير



يا سلام بقا على مدونة أستاذنا فشكول و على المعلومات التاريخية و الخبرة و خفة الدم اللى ممكن تشوفها

و لا مدونة سووول الجميلة ... بحس ان كلامها بيلمس روحى بجد .. و كأن صوت روحها بيكلم روحنا مش عقولنا :)

و لا مدونة مسدس صغير بقا... يا خبر يا خبر يا خبر... كمية سخرية ضاحكة على كلام زى الرصاص على تخبيط سياسى .. كوكتيل محصلش :)

و مدونة مرمر الجميلة
life is still smiling on u..
و أشعارها الجميلة اللى ما زالت بتفكرنى بنزار قبانى :)

وورد شان سمايلى روز.. و مدونتها الرقيقة زيها

انا مهما دورت ف دماغى مش هخلص عدد المدونات اللى بتشدنى جدا و بحب أقراها جدا

أنا أسفة لو نسيت اسم
بس بجد عالم التدوين أصبح عالمى المحبب اللى بهرب فيه من عالمى الحقيقة
:)

و بما ان بقا البوست كله ع المدونة
فكالعادة هعتذر

خلاااص الامتحانات ع الأبواب و مضطرة أستأذنكم لحد يوم 15-6 ان شاء الله أكون اتحررت :)

Sunday 19 April 2009

اقرار


مش عارفة ليه محدش بيعترف أبدا انه سعيد


مش عارفة ليه لما بنفرح بنخاف


نخاف نقول


نخاف نتأكد م الفرحة


بنخاف من مجرد الاحساس بالسعادة


ليه لما بتكلمنى أى واحدة من صحباتى بتكون دايما عايزة تشتكى و تعيط


ليه دايما لما بقلب فى المدونات و اتفرج عليها كويس بتجيلى حالة أسى غربية


طبعا من كمية الخواطر الحزينة و القصص المؤلمة و النقاشات السياسية اللى غاالبا بتكون محبطة


ليه الناس كلها مضايقة كدا!!!


و ليه لما بيفرحو مش بيقولو


ليه مش بفتح كراسة الشعر بتاعتى غير و أنا ف أسوأ حالاتى


مع انها بتكون لأسباب تافهة




أيوة أيوة.. أعترف انها تافهة


امبارح واحدة من أعز صديقاتى قالتلى.. أنا حظى وحش أوى فى الدنيا.. و محدش بيصدق ان الدنيا ملطشة معايا كدا


هههههههههههههههههههه


يعنى واحدة يادوب لسة مكملة 19 سنة انهاردة بالظبط.. كل سنة و هى طيبة :)


و ف كلية حلوة... و بنت جميلة ماشاء الله .. و مرحة.. و عندها صحاب كتير.. و صحابها بيحبوها


لييييييييه بتقول على نفسها كدا بس !!


على فكرة بقا انا اكتشفت حاجة.. اللى بيحزن.. بيكون عايز يحزن.. بيكون دا نابع من جواه


بجد و الله




أصل لو الواحد فرح أوى أوى بيشتاق للحزن.. بيحس انه عايز يعيط


و الله الناس دى حالها غريب أوى




مش عارفة سبب محدد لكتابة البوست دا


غير انى الحمد لله حاسة بالسعادة :)


من غير سبب.. الا انى عايزة أفرح و ليا مزاج أتبسط :)




شوفتو بقا الحكاية سهلة ازاى ؟




لو حسيت انك مخنوق من روتين الحياة الممل كلم صحابك و اخرج معاهم خروجة حلوة


لو صادفتك مشكلة حقيقية.. الجئلو.. ربنا قادر


هيمحى حزنك و يفرج همك و غمك فى ثانية.. بس انت ادعى بقلبك و الجئلو بجد




تعرفو انى جربت مرة نظرية الدكتور خشبة بتاع فيلم فئاد المهندس


بس طبعا ماقولتش انا مش قصير قزعة انا طويل و أهبل




لكن اليوم دا كنت مضايقة جدا جدا


من غير سبب مقنع كالعادة :)


و قعدت أقول لصحابى انا فرحانة


انا مبسوطة


انا مش عارفة مالى أكتيف اوى انهاردة و حاسة انى عايزة أخد الدنيا ف حضنى


قعدت أقول كدا لحد ما صدقت


و اتبسط :)


و قعدت أغنى بقا ألف ليلة و ليلة و جانا الهوا جانا


و فضلت سعيدة من تأثير الاقناع دا ييجى أسبوع


رقم قياسى مش كدا :)


ساعات بقعد مع نفسى و أقول مشكلتى ايه فى الحياة؟ ايه اللى بيخلينى أحزن؟


بابا مش عايز يخرجنى عشان أغير جو المذاكرة


ماما متنشنة معايا شوية


واحدة صاحبتى مقصرة معايا و مش بتسأل عليا


لسة ماعشتش قصة الحب اللى بحلم بيها زى أى بنت


و فيها ايه؟


ههههههههههههههه دنا تافهة أوى


الحاجة الوحيدة اللى المفروض تخوفنا على نفسنا و تقلقنا هى البعد عن ربنا


و حلها سهل


ركعتين و كام دعوة و مناجاة لربنا _و ما أجملها نعمة_ فى البلكونة


الحكاية هتخلص:)


بقولكو ايه.
أقر أنا سمر سمير و أعترف بكامل ارادتى و كامل قواى العقلية
أن:
. الدنيا حلوة... و الله العظيم حلوة :)

Sunday 12 April 2009

تاج من سول

أولا
أنا أسفةةةةةةةةة ع التأخير
وا لله بيبقى غصب عنى
ماما بتشيل كابل الكومبيوتر خالص و الله و بتخبيه علشان أخويا بيضيع وقته عليه :)
فضحتك يا محمد يا سمير :)
و الله ببعد غصب عنى و لما بفتحه مش بلحق أعلق عند كل الناس :(
يارب الصيف ييجى بقا

ثانيا شكرا يا سول ع التاج :)

بسم الله :)
اسمك؟
سمر :)
المشهوره بيه وسط اصحابك؟

أقول و لا مقولش أقول و لا مقولش


م الأخر كدا... أبو راوية
هههههههههههههههه
بس محدش يفتن :D
سنك؟

شوية كدا و أكمل ال 19 ان شاء الله
ايييييييييييه
يا مسهل

مجال دراستك؟
الصيدلة
اسم مدونتك؟
فكرة و قلم و حلم :)
صورتك الرمزيه فى المدونه بتعبر عن ايه؟

نعومة و رقة القلب :$ :$ :$
هل فكرت فى اغلاق مدونتك؟ والسبب؟
أكتر من مرة

يعنى علشان للأسف مش بعرف أواظب ...
ايه رد فعلك لو حد قل ادبه عليك فى تعليق؟
أمسحه :)

بس الحمد لله مش حصلتلى قبل سابق
اسوء مدونه ؟
مش فاكرة لأنى لو لقيت مدونة وحشة مش بدخلها تانى و خلاص
هايحصل ايه للايميلات بعد ما تموت؟

هتموت بموتى :(
اديت الباسوورد لحد قبل كده؟
أه لواحدة صاحبتى و غيرته تانى
السفر بالنسبه لك؟
بموووت فيه
المود بتاعك ايه؟

اليومين دول كويس الحمد لله
بتعمل ايه فى وقت فراغك؟
بدخل نت و أتفرج على حمادة عزو :D
الاكله المفضله؟
محشى ورق عنب
الصفات اللى اخدتها عن والدك؟
الكرم :) و العصبية :( بس كدا

أه و الطول :D
الصفات اللى اخدتها من والدتك؟
ياااااااااااااااااااااااه

التأمل و التفكير بعمق بكل حاجة حوالينا
يعنى عكس السطحية معرفش اسمها ايه :)
كتابة الشعر و القصص
امممممم الاقناع.. مقنعين جدا انا و هى :)
و العيون :$
اكتر 6 حاجات بتكرههم؟
النفاق و الخداع و التكبر و الغرورو العنف
اكتر 6 حاجات بتحبهم؟
الصلاة الدعاااااءالحب و الصداقة و مناجاة الله


شخصيتك نوعها ايه؟
متقلبة
لماذا دخلت التدوين من الاساس؟
أعبر عن رأيى و أحاسيسى بحرية
اجمل كلمه قيلت فى وصف مدونتك؟
مش فاكرة

اهميه التعليقات بالنسبه لك ايه؟
أهم حاجة ..
احلى بوست كتبته؟وضع اللينك ثم اذكر السبب؟
بوست أسفة يا نفسى مش مسامحاكى

لأنه كان من قلبى :(
افضل مدونه قرأتها؟
فى مدونات كتيرة أوى بتشدنى

بس أكتر نوع هو اللى بيكون فيه خواطر كتير و أحاسيس كدا
بحب السياسية بردو
كله حلو الحمد لله :)
افضل بوست قرأته؟
بوست اسمه اذا حضرت الملائكة للمدون هيثم الموؤود

و النملة و الطبق لسوول
و سلسلة البوستس بتاعة تاريخ فلسطين للمدون فشكول (عمو صلاح)
و بوست و الله لأشتكى لأمى للمدون صبرى سراج
و بوست أنا حبيت للمدونة أمل.. بس خلاص مسحت المدونة :(

كتير أوى مقدرش أعدهم
الشغل بالنسبه لك؟
لسة مجربتوش

بس قلقانة منه


الانترنت بالنسبه لك؟
الدنيا اللى بهرب فيها من دنيتى الحقيقية

بس بقا بيخوفنى أوى
تمرر التاج لمين؟
مش همرره لحد :)
هأعفو عنكم بقا :)

ثالثا.... أنا أسفة انى مش رديت على تعليقات البوست اللى فات
أوعدكم هرد قريب
اعذرونى مشغولة وا لله

Thursday 19 March 2009

بحبك


كل سنة و انتى بكل صحة و خير و سعادة يا أحلى أم فى الدنيا




يا أقرب صديقة ليا




يا أغلى حد ف قلبى




يا ماما :)




ربنا يقدرنى و أشرفك و أفرحك بيا يا أغلى و أحلى أم




بحبك يا ماما أوى أوى و مش محتاجة عيد الأم علشان أقولك كدا


انتى عارفة بحبك قد ايه :)




يا صديقتى :)

Tuesday 10 March 2009

هنعرف نبدأ بنفسنا؟

كنت فى الكلية و مستنية المحاضرة تبدأ
يارب تبدأ... يلا بقا انا زهقت
الدكتر اتأخرت كدا
ببص... لقيت زميلتى قاعدة جنبى.. عنيها فيها يأس.. بتشرب كانز..و ماسكة مجلة صغنونة
ايه دا يا سوسو؟
دى بتاعة كدا ادوهالنا فى الشروق يا سمر(بالمناسبة الشروق دى هى المكتبةا للى بنجيب منها ورقنا اللى بنذاكر منه )
طيب ايه يعنى هى عبارة عن ايه؟؟
أنا عارفة .. مجلة مجانية بس فيها اعلانات جامدة

فتحت المجلة.. شوفت مواضيع شبابية جميلة
حجات بجد مهمة جدا للطلبة
و فى البيت فتحت المجلة تانى بتأنى
لقيت انى ممكن أكتب فيها
معقول ممكن :)
اه وا لله طلع ممكن
جريت ع الكومبيوتر العزيز و بعت كام موضوع م اللى كتبتهم
بس بردو ماكنتش متأكدة م الاجابة
ردو عليا :)
و عجبهم موضوع من المواضيع و هينشروه فى المجلة
هييييييييييييه هيييييييييييييييه
مفيش مبروك و لا ايه ::)
و بعدين بقا اتطلب منى أفكار لتفعيل الحملة
حملة؟ حملة ايه؟
منا أصلى عملت حملة للناس
ههههههههههههههههههههه
كتنى خيبة.. دنا نفسى محتاجة حملة كبيييييرة علشان أتغير كليا و تماما علشان مش عاجبانى
قال و كاتبة حملة.. كلام مجرد كلام.. و قال الحملة دى لقولها راااعى
و قال لازم تتفعل
و قال هتنزل صفحة أولى فى المجلة
يا خبر أبيض ع الورطة اللى حطيت نفسى فيها
الحملة بقا اسمها ايه
اسمها حملة... ابدأ بنفسك
طب ماأبدأ أنا بنفسى.... دلوقتى انا أعمل ايه
بفكر أوى انى أعتذر
حاسة انى مش اللى أستاهل أكون بادئة حملة زى دى :(
و بعدين بقااااااا؟
قالولى شوفى مجموعة من أصدقائك علشان يبقى طلبة الجامعة اللى بدأو الحملة
و قوليلنا أفكار تفعيلها
قولتلهم نعمل ملتقى فكرى
كل طالب يكتب ف ورقة العيوب اللى عايز يتخلص منها
و مدير المناقشة يقولو خطة مناسبة للتخلص من العيب دا
تنفع الفكرة دى؟
حاسة انى بعمل حاجات مش قدها
و انى بالبلدى كدا .. بوق.. بقول كلام و خلاص
مش عارفة بقا.. انتو ايه رأيكو؟
أعتذر؟
و لا أفكر فى أفكار تانية؟
طب ماتقولولى أفكار
أصل ماحدش هيعترف بعيوبه بسهولة
هى أصل الحملة عبارة عن ان ماحدش يقول هو انا اللى هغير الكون
كل واحد يحط عيوبه قدام نفسه.. قدام نفسه... و يعمل خطة لتغييرها
سجاير بقا ناس مابتقاطعش حد مابيصليش رمى القمامة فى الشارع
أى عيب.. أى عيب
بس أنا بقولهم هنعترف قدام نفسناااا
تتفعل ازاى دى بس
حد يرد عليا :(

البوست ملخبط أخر حاجة انا عارفة

Sunday 8 March 2009

باك :)

أنا أسفة انى بعدت الشوية دول بس بجد و ربنا كنت فى حالة لا أحسد عليها خالص
أسبابها كتير... عارفين لما تشوف الدنيا قدامك كدب فى كدب و تحس ان كله بيحور على كله !!!

ربنا يخليكى ليا يا أمى.. طلعتينى م اللى كنت فيه

و رجعتلكو و كلى حنين أقرا جديد كل المدونين اللى بحبهم :)

Tuesday 3 March 2009

مغلق


أسفة..... حاسة انى مش قادرة أكتب..... مضطرة أغيب شوية و أراجع نفسى ..... ادعولى





Saturday 21 February 2009

أية



أنا صحيح قولت ان المدونة هتنشر بوست كل يوم ثلاثاء.. بس انهاردة يوم مش عادى.. و كان لازم أقدم معاد النشر أسبوعي

الليلة عيد يا رجالة

عيد صداقتى أنا و أية

22 فبراير






حبيبة قلبى و صديقة عمرى و توأم روحى




مهما أتكلم مستحيل أوصف علاقتى أنا و أية عاملة ازاى




زى السما و النجوم




زى البحر و السمك




بحبها جدا جدا




و بقولها... كل سنة و انتى طيبة يا أحلى أية ... يا معنى الصداقة فى قلبى ... يا مرايتى اللى بكون أنا قدامها و أبان بكل أخطائى و مازعلش لما تنصحنى و تلومنى




يا ..... بلاش أقول عمرى... ينفع نص عمرى؟؟!!!!؟




بكرة يوم 22 فبراير 2009 أكون أنا و أية تمينا 9 سنين صحاب




و احنا عندنا 18 سنة




يعنى نص عمرنا قضيناه مع بعض.. و بما ان النص التانى هو مرحلة الطفولة أو نقدر نقول جزء كبير منها




فأقدر أقول بقلب جامد و بالفم المليان.. انتى يا أية عمرى كله ... بجد مش كلام أفلام :)




كل سنة و احنا طيبين يا أية




من تسع سنين كنا بالفعل أصدقاء ملناش غير بعض




كل الأيام ما بتمر و تعدى كل ما ببص للناس حواليا و اللى فاكرين نفسهم صحاب و أبقى نفسى أقولهم.. لأ.. غلط.. دى مش الصداقة .. تعالو شوفونى أنا و أية و اتعلمو مننا


أية ... احنا صحاب بجد يا أية


فاكرة زمان لما زعقتلك انك مش بتصلى؟؟ و لما قولتلك الصلاة عماد الدين :)فاكرة؟


كنا تقريبا فى رابعة ابتدائى :)


طيب فاكرة لما انتى خليتينى ألبس حجاب طويل؟ فاكرة يا أية ؟


فاكرة لما علمتينى ماأعليش صوتى قدام أمى... فاكرة لما قولتلك لازم نبطل ماكياج


صحاب بجد يا أية.. أصدقاء.. رفعنا بعض.. حبينا بعض من قلوبنا


من قوة احساسنا ببعض خلينا أهلى و أهلك أصدقاء ..... انتى صديقة عمرى يا أية :)


كل سنة و انتى طيبة يا حبيبتى


فى يوم كان عندى 11 سنة ... حدااااشر سنة ... و قولتلك


حبيبتى و روحى أية


يا أول بداية و أخر نهاية


حبى ليكى مايتحكيش فى حكاية


قربتينى من الحب و الهواية


بعدتينى عن الشر و الغواية


أية و سمر.. يا بسمة سهر


يا نسمة عطر


ياللى شايفاكى أحلى من القمر


ياللى ف عقلى معنى الحب


يا جوة الننى و العين و القلب


أية ياللى للخير و الحب.. درب


:) :) :)


طيب فاكرة أقوى عاصفة مرينا بيها؟؟ فاكرة الحاجة اللى تصورو انها هتهدم صداقتنا و مقدرتش لثانية تعمل دا ؟؟


فاكرة يا أية ؟ كانت من حوالى سنة تقريبا .. فاكرة؟


لما قولتيلى


أخطأت فى حبك بعض الخطأ


و ظمأت فى بعدك كل الظمأ


فاليكى منى هذا النبأ


حبيبتى لم يعد وقت للعتاب


حبيبتى ان كان لكى فى قلبى حزن.. فقد ذاب


أذكرك و أنا فى غربتى


و أرى صورتك فى صفحات الكتاب


أحبك و أعتذر عما سببته لكى من عذاب


أذكرك فأنتى لى أغلى الأحباب


صديقتى,أعتذر عما فات


فهو لى قد مات


و أتمنى أن يكون لكى محى حتى من الذكريات


اليكى تلك الورقة فهى بقلم ضعيف


و لكنها بقلب حانى.. و ظل خفيف


أتمنى أن يعود قلبك يهوانى


و ان أبى فهو بذلك يكون أنهانى


سامحينى.. فقد أخطأت.. و ندمت عما فعلت


و اليكى اعتذرت


23-12-2007


و فاكرة رديت و قولتلك ايه يا صديقتى؟؟


قولتلك


حبيبتى .. خطأك هو أن اعتدتى ألا تأثمى


ظمأك كوانى و أزاد حبك فى دمى


نبأى أنا أن عتابى ليس لتندمى


هذا عتاب الصديق المحب المغرم


ذكرك لى هو أغلى اعتذار عن حيرتى


فعذابى الحقيقى كان حزنك من أجلى يا مهجتى


أنا التى أعتذر.. فكانت عمياء غيرتى


أردت أن أكون دنيتك.؟. لأنك دنيتى


لم تعتذرى؟ أنا لم أحزن يوما منكى


أنا فقط طلبت أن أكن نور عينيك


و أردت أن تتصرفى و يداى تعانق يديكى


صدمتى ليست فيكى.. لكنها جاءت منكى


قلمك الضعيف سلاحى ضد كأبتى و دموعى


قلبك الحانى ينبض من بين ضلوعى


و ظلك الخفيف يضىء ظلام دنيتى بالشموع


و غربتك بعيدا عن عينى


تملأ روحى بالدموع


أتتمنى أن يعود قلبى يهواكى؟


و تخافى ان أبى و أنهاكى؟


نعم سيأبى .. لأنه لم يرحل يوما عن دنياكى


ماعذرك الأن,و قد ظننتى أنه سينساكى؟


25-12-2007


و مرت العاصفة بهدوء يا مراية قلبى :)


أنا دلوقتى يا أية مش لاقية حاجة أقولهالك غير شكرا


شكرا ع الصداقة الحقيقية اللى ربنا جعلك سبب فى انى ألاقيها


شكرا ع الذكريات الجميلة اللى عشناها سوا


و الحمد لله انى متأكدة ان ولادى هيكون ليهم خالة ان شاء الله


صحيح مش خالتهم وراثيا :)


لكن هتكون أحسن من الخالة معنويا ان شاء الله و أنا متأكدة من دا :)


قالولنا لما تدخلو تخصصات مختلفة ف ثانوى هتبعدو


أنا كنت علمى علوم و انتى أدبى و فضلنا توائم


قالو الكلية بتشغل.. كل واحدة فينا فى كلية مختلفة تماما و لسة توائم


قالو لو واحدة اتخطبت هتبعد عن التانية


و اتخطبتى يا حبى و لسة و هنفضل ان شاء الله توائم


عقبالى يارب :D


كل سنة و احنا طيبين يا أية


و عقبال مانعيش تسع تسع سنين كمان كدا سوا :)


و ربنا يبعد عننا العين يارب :$ و يخليكى ليا :)


أسفة لو البوست طول منى حبتين بس دا لأنى بكتب لأية مش لأى حد :$

Tuesday 17 February 2009

اعتذار و خبر و موضوع و طلب

سلام عليكم

اعتذار و خبر و موضوع و طلب فى بوست واااحد.. شوفتو الطمع :)
بعتذر جدا عن التأخير دا بس دا بجد علشان الدراسة بقا
مانتو عارفين

بالنسبة للخبر بقا.. فأنا شوفت انى بدل ما أتأخر مرة ف مرة عن البلوج لحد ما أكسل أدخل أصلا زى ماحصل قبل كدا
أخلى فيه معااد ثابت للنشر :)
كل يوم تلات بعون الله .. علشان التلات أجازتى :)
و يبقى عدد أسبوعى بقا.. حتى أجازة أخر العام ربنا يجيبها بالسلامة كدا يارب ان شاء الله

الموضووووع بقا اللى عايزة أتكلم معاكم فيه أهو :)

حاجة حثنا عليها ديننا و أمرنا بيها الرسول صلى الله عليه و سلم مش بس أمر دينى .. دا كمان أمر انسانى و أخلاقى وواجب اجتماعى لابد منه و المفرووووووض ان كلنا ننفذه الأمر بالمعروف و النهى عن المنكر جملة قريناها كتيييير أوى أوى فى كتب الدراسة من أيام ابتدائى و فضلنا نسمعها كتير.. لحد مابقت مجرد حروف بنرددها .. ياترى كام واحد فينا بيتفكر فيها لما يسمعها أو حتى لما يقولها و الله كام واحد بيعمل بيها؟؟؟ راح فين "من رأى منكم منكرا فليغيره.... " راحت فين المبادىء اللى كلنا اتربينا عليها؟ كلنا حافظينها و يمكن صم كمان بس مين فاهم بيقول ايه فى يوم كنت راكبة التراااام و ماسكة بقا فيروز التطور الطبيعى للحاجة الساقعة و و لا فى دماغى الدنيا لقيت بنت بتقولى 3 جمل.. ممكن أقولك حاجة.... ممكن ياريت ماتشربيش الحاجات المقاطعة دى... ذنب الأطفال اللى بتموت ليه تشيليه دا ذنب خطير أوى... قالت كدا و انا بقيت محرجة و ف نص هدومى .. نزلت البنت فى المحطة اللى بعدها على طول.. و سابت فيا أثر عالى أوى أوى.. احترمتها جدااااااااااااااا و حسيت انى ضعيييييفة قدام مطالبى كلها.. و انى أقل مما كنت متصورة بكتير.. حسيت أحاسيس مخجلة ليه ماكونش فى شجاعة البنت دى؟؟؟ ليه مايكونش حبى لدينى و دفاعى عن مبادئى أهم من أى حد فى الدنيا.. و لا يهمنى الاحراج و لا الناس .. مايهمنيش غير انى دافعت عن قيمة و تمسكت بيها .. أنا حاولت أعمل زى البنت دى ف يوم.. كنت بجمع تبرعات لغزة فى الكلية.. و بنت كلمتنى بطريقة وحشة جدا جدا جدا لما قولتلها اتبرعى و قاطعى .. هاجمتنى هجوم عنيف و ازاى نقاطع دا كل المنتجات بتاعتهم هنقاطع ايه و لا ايه فى أساسيات و أتبرعلهم ليه ماهو مصر أولى مصر فيها فقرا كتير و أنا بحاول أقنعها لقيتها بتقولى.. انتى عايزة ايه منى يعنى دلوقتى و مشيت بس عارفين؟ حسيت انى كبيييييييييييرة ف نظر نفسى .. فى اللحظة دى بجد حسيت انى فخورة بنفسى أوى أوى أوى.. أنا أصلى طول عمرى كدا مش بحب حد يحرجنى أبدا بتجنب أى موقف زى دا.. عمرى ماطلبت انى أكلم حد أو أتعامل معاه الا قليل جدا علشان ماينفعش أتحرج .. مش بقبلها.. و لو حصلتلى ف موقف مختلف ممكن أقعد يومين أعيط فى أوضتى لكن أنا حتى الأن لما بشوف البنت دى فى الكلية رايحة أو جاية بينتابنى شعور غريب بالسعادة.. و انى مش وحشة و لا حاجة بعيدا بقا عن المقاطعة لأن دا مش موضوعنا مش عارفة ايه اللى جابه مين فينا بيشوف اللى بيكدب اللى مش بيصلى اللى بيشرب سجاير كمان اللى بيعصى أمه و أبوه اللى بيخنسر فلوس.. هى اسمها سرقة بس بيدولها مسميات تانية .. من أبوه اللى بيرتشى اللى بيتعامل فى الربا و بيتكلم و يقول عيييييب و بينصح و يقول حاول تبطل ؟؟؟؟؟؟؟؟؟ جاوب بصراحة.. و قوللى مواقف

و أخيرا فى طلب صغير كدا.. ممكن تدعووووووولى علشان أعرف أذاكر بجدية بقا و مبقاش زى السنة اللى فاتت
يعنى ببساطة ادعولى أدح

هروح أرد على تعليقات البوست اللى فات بقا :)

Tuesday 10 February 2009

حاجة تنرفز


دى حاجة كدا كنت كاتباها من فترة ف أحد المنتديات الالكترونية

و لأن نفس الفكرة تساورنى الأن

فقلت أنزله تانى هنا فى المدونة



أكيييييييييد كلكو سمعتو ان المنايفة معندهومش أصل و غدارين

و طالما الانسان اللى قدامك م المنوفية يبقى حرص منه و اعرف انه هيخونك.. سمعتها كتير

مين بقا سمع ان (المصاروة ) القاهريين يعنى بجحييييين و عينهم يندب فيها رصاصة و بيغلطو و يقولو محدش له عندنا حاجة..

أكيد المعلومة دى وصلت للى برة القاهرة

بس أكيد كلكو عارفين ان أهل دمياط بخلة

اللى ماكنتش سمعتها و سمعتها قريب بقا بنات اسكندرية مش محترمين و سفلة و أهل اسكندرية دول مايتناسبوش

انت لو برة اسكندرية أكيد حد حاكالك

زى ما هنا ف مصر قالو ان فى السعودية بيعاملو الحريم زى الجوارى

و زى ما فى البلاد العربية بيقولو مصر مش عرب.. مصر مش مننا .. و المصريين كخة

و زى ماحنا عارفين ان لبنان مقر الانحلال فى الوطن العربى و مليانة...... مزز:D

و زى ما برا بيقولو العرب متخلفين

انتو فاضيين؟ أنا عن نفسى فاضية و هرغى لو وراك حاجة قوم:D

شوية مواقف كدا عاوزة أعرف رأيكم فيها

الأول: كنت عند صاحبتى مامتها بتتكلم عن ناس عاوزين يناسبوهم (بالمناسبة هما م المنصورة) فبتحكى الأم أمامى و تقول:: احنا مستحيل نناسب من اسكندرية احنا داحنا من المنصووووووووووووورة نقوم فى الأخر ناخد ابنها اللى من اسكندرية

ليه بقا ان شاء الله هو أهل اسكندرية دول نكرة و لا ايه.. دا حتى من بحرى و بنحبوه

الثانى:: كنت فى دريم بارك مبسوطة و فرحانة و ف طابور لعبة الشلال أنا و أصحابى لقينا شوية بنات عسولات أوى معانا فى الطابور اللى عمره ما خلص بيتكلمو حبة عربى على حبة فرنساوى بقولها انتى اسمك ايه يا حلوة ؟ (طبعا مع الابتسامة الرقيقة) قالتلى اسمى كذا و هى مكلضمة سألتها انتى منين؟ قالتلى م الجزائر قولتلها بجد و بكل براءة قلتلها نورتو مصر.,. و عجبتك مصر يا حبيبتى..

و انطلق شلال الشتائم اذ فجأة من البنت و و الله العظيم تلاتة ما بهول هوا دا اللى حصل بجد فعلا قعدت تشتم و مع اللهجة الجزائرية بقا ماأقولكش احنا عندنا فى الجزاير بنكره المصريين انتم مش عرب العرب بيكرهوكم انتم مش بتحبونا احنا العرب.. برقت بكل شر:D و قولتلها طب ما بردو احنا عرب

و عينك ماتشوف الا النور بقا لاااااااااااا انتم ............... تييييييييييييييييييييييت فى كلام عيب اتقال

و سلملى ع المترو

الثالث: مدرس الكيميا جاتله طالبة عاوزة تاخد عنده قال لأ مش واخدها.. ليه يا مستر؟ أصلها م المنوفية.. و الله حصلت قدامى :(

تفتكرو ينفع نحكم على حد من غير مانجربه ف موقف و اتنين و تلاتة ينفع نقول فلان دا فيه كذا عشان م الحتة الفلانية أنا بجد مش فاهمة ازاى حتى الأن فى ناس بتفكر كدا... ازاى مانتعاملش مع اللى قدامنا و نشوف أفكاره و أراءه قبل مانحكم عليه لمجرد انه ف جماعة مشهور عنها من قديم الأزل ان فيهم صفة معينة وحشة الموضوع دا منرفزنى أوى بجد أنا بتعصب لما بسمع أى تعليق زى دا عمرك سمعت حد أفكاره كدا؟ و لو ماسمعتش شعورك ايه بعد ما قريت البوست؟؟
مش فاهمة ازاى لسة فى ناس بتفكر بالعنصرية و التعصب دول !!!!

Friday 6 February 2009

تاج و واجب عليا :)

أولا أنا بشكر سووول على التاج دا مع انى بشوف ان الناس مش بتشكر فى الظروف اللى زى دى بتزعق :)
بس أنا هشكر بقا :)

ثانيا أسفة يا سولى ع التأخير معلش و الله بس أنا اليومين اللى فاتو أصلا ماكنتش بقعد فى البيت علشان كدا ماكنتش عارفة أتواصل خالص
ثالثا.. الاجابات بقا :)
السؤال الأول: ..
بدأتِ التدوين إمتى؟؟ ودخلتِ العالم ده إزاي؟؟
بدأت تدوين الصيف اللى فات :D
أولا كدا كنت بسمع عن المدونات فى البرامج التليفزيونية و بالذات برنامج شبابيك و عجبتنى الفكرة جدا لأنى من وأنا زقردة و عندى عشر سنين كنت أمسك الورقة و القلم و قال ايه بكتب سعر.. و قثة قثيرة.. ههههههه بس ماكنتش بردو عارفة البداية تيجى ازاى
و بعدين على أحد المنتديات المفضلة جدا جدا بالنسبالى تقريبا مش بدخلالا فيه و هو منتدى أى كلام فى موقع ايجى فيلم لقيت ناس كاتبين على المدونات بتاعتهم و قد ايه العالم دا جميل.. قولت مابدهاش بقا :D
بعت لأحد الأعضاء دول و هو الأستاذ صبرى سراج صاحب مدونة صمت البحر.. و قاللى أدخل فين و ازاى علشان أعمل بلوج.. و كانت دى البداية :)
السؤال التاني
إيه كان إنطباعك ف البداية؟؟
فى البداية كنت سعيدة جدا بالتدوين.. و كنت بكتب بحماس عالى أوى أوى.. و بعدين جيت شوية وقفت خالص.. لييييه؟ علشان القليلين اللى كانو بيردو عندى مش بقو يردو :(
قلت خلاص أكتب اللى انا عايزاه فى الأجندة بتاعتى و خلاص بقا
لازمتها ايه المدونة و محدش بيقراها.. و بعدين صاحبتى و حبيبتى سلمى عصام صاحبة مدونة NEW HOPE
عرفتنى أعمل ايه علشان أوصل صوتى للناس.. و قالتلى ادخلى من بلوج لبلوج لبلوج و اللى ماتعجبكيش و فيها أفكار وحشة ماتدخليهاش تانى.. و قد كان :)
و اتعرفت بالطريقة دى بجد على أحسن ناس
السؤال الثالث: مين أكتر حد بتحب تعليقه عـ البوست الجديد؟؟
و الله بفرح بأى تعليق عندى و فى أشخاص معينين بستنى ردهم مخصوص و بدخل ساعات مخصوص أشوف ليهم كومنت و لا لأ
بفرح جدا كمان لما أكسب مدون زائر جديد
السؤال الرابع: إيه أهــــم حاجة إتعلمتها في عالم التدوين؟؟
بجد التدوين ليه فضل كبير عليا فى زيادة مهارتى الأدبية .. مهارة ايه بس مش للدرجة دى هو انا عندى مهارة أصلا..ممممم قصدى قدرتى ع الكتابة يعنى.. معرفش بقا :d
كمان التدوين زود بشكل كبير من ثقافتى العامة و عرفنى على أفكار و أسلوب ناس مختلفة من كل الطبقات و دا عمل عندى حاجة حلوة أوى و توازن كبير
السؤال الخامس: إيه أكتر حاجة كرهتها؟؟
يعنى تعصب بعض المدونين لرأيهم بشكل كبير و عدم استعداد البعض لسماع أى فكرة مخالفة أصلا.. بس كدا
السؤال السادس: حاسس إن التدوين ليه تأثير؟
أكيييد طبعا :)
السؤال السابع: تهدي التاج لمين؟؟
فى ناس موصيانى كتير انى ماأهديلهاش أى تاج و الا هيزعلو :D
هو الناس مش بيحبو التاجات ليه.. دى حتة بتطلع حاجات حلوة من القلب
عموما... مممم بداية بهدى التاج لسلمى حبيبتى حياتى كلها لله
و لجنى مجدى الرقيقة
و مسدس صغير
و عاشقة الورد صدى الصمت
و promise is promise

متهيألى كفاية.. مش كدا و لا ايه ها :d
و الله يا سول لو ينفع أهديهولك و أرده تانى كنت عملتها
بس قريب ان شاء الله هعملك واحد اكسكلوسيف عشان خاطر عيونك
تحياتى :)

Thursday 29 January 2009

الذين خرجو من الدائرة


خرجت الفتاة من مكمنها بعد لأى..فمنذ أن توقفت طلقات النار و صيحات المستغيثين و هى تحاول أن تخرج الى العالم لترى الى أى حال وصل به الدمار .. خرجت فاذا هى فى فضاء شاسع..فزعت الفتاة..أى النازل و المحلات التى كانت تنتشر على جانبى الطريق


أين الأنوار التى كانت تغرق المدينة فى بحر من الفضة الذائبة


بل أين الناس هل صارو جميعا الى هلاك!!


فأين اذا أجسادهم!!!؟؟


انها لا ترى أمامها سوى الفضاء


الأرض و السماء و بعض السحب القاتمة


اهتز تفكير الفتاة.. هل أنا فى مكان غير المكان ؟..أو فى زمان غير الزمان؟


عندما دخلت المخبأ كان يحتشد أمامى ملايين من البشر.فأين ذهبوا؟




و بعد فترة اعتادت خلالها الفتاة مارأت راحت تفكر بشكل أخر.فنهضت من جلستها التى طالت و راحت تمشى على غير هدى و كأنها تأمل فى وجود أشخاص مثلها تسربو من دائرة الدمار فى مكان أو أخر


مشت الفتاة كثيرا حتى دميت قدماها دون أن تشعر..فتوقفت مرغمة و ارتمت على كومة من التراب باكية


هل تطاق الحياة هكذا !! هل وحدها فى كون واسع طويل عريض تستطيع أن تشعر بلذة العيش و ان حتى توفرت لديها كل الملذات؟


انها فى ذهول يكاد عقلها يطير و فجأة....و هى فى قمة ضياعها سمعت شيئا كدبيب الأقدام_فى هذا السكون الهائل يسهل سماع أى شىء,فطار قلبها فرحا و قفزت قفزة سريعة


لابد انه انسان مثلها استطاع أن ينجو بنفسه.. و تهللت فرحا و دققت النظر فى ذلك الشىء الأتى من بعيد و كانت تتضح معالمه كلما اقترب حتى تبينت حقيقته....انه كلب


كلب ينجو من معركة الموت و لا ينجو انسان!!انها تحتاج الأن الى انسان تحت أى ظروف و بأى مواصفات حتى تستطيع أن تشعر بالأمان و الحياة..تريد أن تتكلم .. تتشاجر..تشارك سواها فى ذلك الخطب الجليل


و على الرغم من ذلك فقد سعدت الفتاة بكلبها و سعد بها و ارتمى فى حضنها الدافىء محاولا الهروب من برد الشتاء


و بعد قليل بدد نور الصباح ذلك الظلام الحالك و نشرت الشمس أشعتها فى الكون فساد حول الفتاة احساس ببعض الطمأنينة.و قامت و كلبها و أخذا يمشيان على غير هدى


و رأت الفتاة ما أسعدها..فقد لاح لها من بعيد منزل شامخ من تلك المنازل الضخمة الفاخرة


و من الواضح أنه المنزل الوحيد الذى لا يزال صامدا حتى الأن


فسحبت الفتاة كلبها و ذهبت الى حيث يوجد المنزل و دفعت بابه ففتح


و دلفت الى الداخل كل شىء على ما يرام,كان من الواضح أن أهل المنزل تركوه فى حالة مفاجئة و لم يعودو لأنها وجدت مائدة طعام ممتدة أمامها و قد اصطف عليها مختلف ألوان الطعام و الشراب


فنزلت عليه الفتاة حتى أشبعت جوعها و أطفئت ظمأها و سحبت كلبها الى أحد الغرف و أطلت من نافذتها على الأرض الواسعة فرأت ماكان لا يخطر على عقلها...رأته.. انه الانسان الذى انتظرته طويلا,طويلا جدا..فالساعة فى مثل هذه الوحدة تكون أياما و اليوم شهورا . لقد ظهر أخيرا رجل من جنسها .. يفهم لغتها و له قلب كقلبها... و ارتجف بدنها خوفا و رجاءا .. و فكرت,لابد انه أيضا يحتاج الى .. لابد أنه أيضا سيسعد بى و يرتمى بين يدى و يطلب من حنانى و ينهل من عطفى و دفئى .. فلسوف أوريه مااستطعت من كل هذا .. لقد اكتشفت الفتاة أن العطاء هو قمة الاحساس بالسعادة

يكفى أنك تستطيع أن تعطى أى شيئا.. أى شىء,و لو كلمة طيبة... دخل الرجل الى المنزل و دخل الى الغرفة بالذات التى توجد بها الفتاة و كأن يدا خفية تجذبه اليها و كأنما كشف له عن مكانها احساسه المتعطش بها و حاجته اليها.. و تلاقت عيونهما فقالت له فى صمت كل القول و حكت له كل الحكايات و تمنت فى هذه اللحظة لو يضمها اليه فى حنان و يعيد اليها كيانها و احساسها بالحياة .. و حدثت الفتاة نفسها... لابد أنه يفكر مثلى لكنه يخاف ... يخاف رفضى له.. يخاف بعدى عنه .. أه لو علمت يا حبيبى ما أنت بالنسبة لى .. كانت عيناها تقول كل هذا فى صمت أبلغ من أى كلام و بينما هى فى نشوتها دلفت الى داخل الغرفة امرأة جميلة .. فمد الرجل يده اليها و قال فى تعجب و استغراب شديدين... "لعلها نجت مثلنا يا زوجتى العزيزة"!!!!؟
أنا عايزة أوضح ان السعادة ممكن حد يتعب أوى و هو بيدور عليها و يحس بوحدة قاسية و جامدة أوى .. بس لما يلاقى الانسان اللى ممكن يقف جنبه و يسعده.... يضيع منه ف غمضة عين...و يرجع للوحدة تانى

Monday 19 January 2009

قضية الاختلاط ما بين التشدد و التسيب


أرهقنى التفكير و استهلك منى الكثير من الوقت كى أصل الى نتيجة فى هذا الأمر الشائك,و لكن,دون أدنى فائدة

فقد أصبحت قضية الاختلاط و مدى شرعيتها تشكل بالنسبة الى أمر محير,بل أوشكت أن تصل معى الى عقدة نفسية

فوجهة نظرى تختلف عن وجهة نظر غيرى و وجهة نظر غيرى تختلف عن وجهة نظر غيره...و لا أعرف حتى الأن وجهة نظر الدين فى ذلك..أو بمعنى أدق أخاف أن أعرف..أو بمعنى أصح أعرفها و لا أقتنع بها أو نقول لا أريد أن أقتنع بها أو ربنا أريد و لا أستطيع...لا أعلم

أعلم أن أوامر الله و نواهيه لا يصلح أن نفكر فيها و يجب أنا ننفذها بدون أى تفكير لأن الله له حكمة فيها لا نعلمها

و لكن..فى هذا الأمر بالتحديد لا أعلم ما هو رأيى فى هذا الموضوع لكى أعلم أهو مخالف لرأى الدين أم مماثل له..نعم..اننى لا أعلم رأيى حتى الأن

فأنا أغيره_فى هذا الأمر_فى اليوم مرتين أو ثلاثة و أغير أسلوبى فى التعامل عدة مرات فى الأسبوع الواحد..هل أنا مجنونة ؟؟؟؟؟؟؟؟؟؟؟

فى يوم ما .. أكون الفتاة التى لا تتحدث اطلاقا مع الجنس الأخر و أقصى علاقاتها به هى أن تسأل السائق عن الأجرة أو تسأل المعيد عن لون مادة كيميائية معينة

و يوم أخر أتغير..الى الفتاة التى تقول الى الفتاةالثانية التى تقول صباح الخير لزميلها فى الجامعة و تقف هى و أصدقائها مع أخا لصديقتها يتحدثون فى شتى أمور حياتى و التى تتصل بمدرسيها من المرحلة الثانوية و تطمئن عليهم و تسرد لهم أخبارها و التى عندما تقابل أبناء أعمامها و بنات أعمامها يمزحون جميعا و يضحكون و عند زيارتها لأحد الجمعيات الخيرية تتحدث مع من فيها من الجنس الأخر و تحكى و تتكلم _!!!و لا كأن فيه حاجة


أشعر أن شخصيتى تميل أكثر الى الفتاة الثانية ..التى تأخذ الحياة ببساطة و تتكلم مع من تشاء و تصمت مع من تشاء و لكن بالطبع بحدود..و و الله حدود صارمة ..فهى لا تسلم باليد على رجال و لا تخضع بالقول أبدا.....و يكون كلامها فى منتهى الاحترام

و لكن وجهة نظر الدين التى أستمع اليها ممن أثق تعترض على هذا فيجب أن يكون الاختلاط فى أضيق الحدود ..و من الخطأ أن أفعل كما فى الفتاة الثانية من تصرفات

الفتاة الثانية تتصرف بكل بساطة فتصطدم برأى الدين فتتكلف مرة أخرى لتكون الفتاة الأولى المتشددة

أريد أن أعرف حقا فقد تعبت و أوذيت و نقدت كثيرا من نفسى و غيرى بسبب هذه الازدواجية

هل الأمر أبسط من هذا؟أم هو خطير و معقد و شائك فعلا؟

هل يجب ألا أتكلم مع رجال الا المحارم؟

أم أن زميلى فى عملى أو دراستى له الحق فى أن أتكلم معه أو على الأقل ألقى عليه السلام؟

أريد أن أعرف..أريد أن أستقر..أريد أن أقرر القرار النهائى و أعلم ...من سأكون!!!؟؟؟؟

Monday 29 December 2008

أعد نخوتنا يا الله







ليلة تمر عاصفة يملؤها الغضب



أشعلت فى صدرى نارا بدون حطب



أصرخ باستغاثة كأننى فوق اللهب



متى تتحركون يا عرب؟






أمس أباح دم أهل غزة اليهود



و قد اعترفو بخطئهم,عذرا فكان المستهدف الجنود



متى كان أمام الروح كلمة ممن لا يفون بالوعود



أين ذهبت نخوتنا؟ أين شرفنا المعهود؟؟






و اليوم أكملو الغارات فى بلدتنا لبنان



النساء ترتجف و صوت المدافع للعنان



و يالهلع أطفالنا,لا يشعرون بذرة أمان



و ها هو مسلم يقتل برصاصة غدر من رجل جبان؟






و نحن ها هنا نحكى و نلعب و ننهل من متع الحياة



و لا لنا جفن يتحرك,و نعلم أنهم حفاة عراة



يا عرب.. أفيقو .. انه عار فوق الجباه



ألن تنصرو اسلامكم؟..أعد نخوتنا يا الله






أعد نخوتنا يا الله






أعد نخوتنا يا الله

Sunday 21 December 2008

.....حين


حين كانت ضحكتى من قلبى

حين كانت تملأ الدنيا ضياءا فى عينى

حين كان حزنى ,و لو من أجل أتفه الأشياء

يجعل الدنيا أمام ناظرى سوداء

حين كان لحياتى أهداف..

و ان كانت أهداف ليس لها ثمن

و لا تتحقق الا بأسهل الطرق و أقل الجهود

و لكنها كانت موجودة

حين كانت دمعتى تذيب القلوب

و ترقق قلب من ينظرها

حين كنت لا أبتسم الا لمن أحب

حين كانت ابتسامتى لا تخرج الا لمن يستحقها

حين كنت أعبس فى وجه من أكره

حين كانت تصرفاتى نابعة من داخلى

حين كان لا يتحكم بها منصب أو سن

حين كان لا يهمنى من أمامى أبيده مصيرى أم لا

أبامكانه ايذائى أم لا يستطيع

حين كنت لا أجامل... لا أنافق... لا أخاف

حين كان حبى لا يشوبه شىء

و أعبر عنه بقبلة

و حين كان بغضى لا يشوبه شىء

و أعبر عنه بعبسة فى منتهى البراءة

حين كنت أتحدث مع من أريد

و أرفض التعامل مع من لا أريد

حين كنت أرتدى ما أتمنى

حين كانت سنين عمرى تحصى على أنامل يدى

حين كنت طفلة ......... ليتنى بقيت طفلة

Sunday 7 September 2008

رحلة سنين


لا تمتلك ذاكرتى القدرة أن تصل الى ماهو أبعد من السنة السادسة من عمرى, كنت مختلفة بعض الشىء .. فى أول يوم فى المدرسة كان كل الأطفال من حولى يبكون باستماتة للرجوع الى منازلهم أما أنا فكنت سعيدة جدا بهذا التغيير و بهذا المكان الجديد و بهؤلاء البشر الذين وجدتهم فجأة أمامى بعد أن كلن عالمى فقط هو العائلة.. و الغريب أننى لم أكن أر أننى طفلة مثلهم... كنت أشعر و كأننى أكبر منهم بمراحل ..
و فى سنتى السابعة بدأت فى تكوين الصداقات _من وجهة نظرى وقتها_ و بدأت أنتقى من بين زملائى و زميلاتى من سأصاحب و لكن الحقيقة التى اكتشفتها بعد حين.. أننى لم أختر.,, و لكن جميع صداقاتى يجب أنا تحددها أمى و تقبلها أو ترفضها , أمى ذلك القيد الذى أخذ يطاردنى فترة من الزمن و أخذ يحول بينى و بين الانفتاح على العالم الخارجى ..
. فى سنتى الثامنة لم أر أى جديد فى حياتى و لم أختلف الا اختلافا طفيفا,
فى التاسعة من عمرى انتقلت, انتقلت من كل حياتى , من بيت العائلة و من العائلة نفسها و من المكان الذى كنت أعيش به و من علاقاتى و صداقاتى , الى مكان غريب, جديد, و هنا كانت نقطة تحول فى حياتى , فقد تميزت, ووجدت نفسى أفضل ممن حولى فى كثير من الأمور, و اكتشفت أن لدى مواهب عدة لم اكن المسها قبل ذلك , وجدت نظرة الفخر و الاعجاب فى أعين من حولى , كان فرق كبير..
فى سنتى العاشرة وجدت صديقة عمرى التى شاركتنى شطر كبير من أحاسيسى و خبايايا, و تلك أيضا كانت خطوة هامة فى عمرى أننى انتقيت فعلا من سأصاحب بلا قيود ,
من السنة الحادية عشرة الى السنة الثالثة عشرة فتلك أقسى سنين عمرى حتى الأن , فوقتها لم أكن أجد نفسى , لا أعرف أكبيرة أنا أم صغيرة, كنت لا أجيد التحدث مع أى شخص فى أى سن و كنت أيضا لا أهتم بمظهرى, انحدرت ثقتى بنفسى و كيانى, فقد وصلت الى القاع , فمظهرى غير المتناسق مع نظرة الناس لى أننى طفلة ساذجة و نظرة نفسى أننى كبيرة و ناضجة , جعلا منى صورة كئيبة ساكنة لا تتكلم و لا تتحرك و لا تنفعل.. حييت ثلاث سنوات بلا أهداف أو أحلام أو ثقة بالنفس,
فى الرابعة عشرة من عمرى حدث تحول كبير جدا جدا فى حياتى, عندما اعتدت دخول عالم النت .. العالم الذى لو فضل كبير فى تشكيل شخصيتى, ذهلت بهذا العالم الذى يحكم الناس على فيه من خلال أفكارى و أرائى فقط, بعيدا عن مظهرى و سنى , تعرفت على الكثير من الناس بمختلف السنين و المستويات الاجتماعية و الفكرية و العلمية , عادت ثقتى بنفسى عندما بدأت أبدى أرائى و أسلوب تفكيرى و أعرض ما بداخلى دون حرج,بعد هذا السكون الذى كنت أنغمس فيه, و عندما زدت ثقتى بنفسى , زاد حب الناس جميعا لى, و شعرت اننى ولدت من جديد,
فى سنتى الخامسة عشرة أحببت .. الحب من أول نظرة الحب من طرف واحد الحب الأول الحب المتبادل الحب البرىء الطاهر, جميع أنواع الحب فى حب واحد.. و كلما مرت على الأيام أتيقن أننى لن أعطى مشاعر و أحاسيس مثل التى أحسستها وقتها, فقد كان عقلى فى هذا الحب عاطل لا يعمل, و كان القلب هو المتحكم الرئيسى فى كل شىء,
و فى السادسة عشرة كان التحدى .. ضاع منى حبى الأول, ووجدتنى أعطيت كل ماهو مديح لمن هو خبيث, فدفعنى جرحى للعمل , فلم أيئس, و لكن أخرجت كل طاقتى فى الاجتهاد فى الدراسة و العلم لكى أثبت لنفسى قبل أى أحد أننى أستطيع تحمل المسئولية و أننى على قدر من القوة و الصلابة , و الحمد لله على توفيقى فى اثبات ما أريد ,
و فى السابعة عشرة , دخلت عالم أخر , ليس باختيارى و لكن أجبرت على دخوله,هو عالم الجامعة .. غيرت الجامعة فى نفسى الكثير.. علاقاتى زادت و أصبحت أكثر رقيا, أسلوب حوارى تحسن, أسلوب تفكيرى تطور, اهتمامى بمظهرى و الذى اكتشفت مؤخرا أنه ضرورى زاد بشدة , و الجميل أن علاقتى بربى أيضا الحمد لله تحسنت, فقد أصبحت أناجيه دوما , و أحببت لحظاتى وحدى مع الله , و أحسست أيضا بحب الله لى .. نعم .. لقد أحسستها.. الحمد لله ... أيضا لقد غيرت فى شخصى أشياء كثيرة بعد دخولى الجامعة , مثل الحدة فى التعامل و التسرع فى أخذ القرارات...
و ها أنا أكمل الثمانية عشرة عام ... و أتسائل بعد اغراق فى تفكير عميق... أهذا هو الانسان... كل ما فى الانسان يتغير عام بعد عام.. الأفكار و المبادىء و العلاقات و حتى المشاعر.... و من الجائز أن تتغير الطباع أيضا.. يوجد فى حياة الانسان أشخاص كانو فى لحظة ما كل ماله.. و فى لحظة يحاول ان يتذكر ملامحهم فلا يتمكن من ذلك .. ترى من سأكون و كيف سأتغير و اتبدل و أتحول بعد عشرة أعوام جديدة , ان كان لى نصيب أن أعيش اليها...... كل عام و أنا بخير.. و أسئل الله أن يرزقنى حسن الخاتمة

Monday 18 August 2008

أسفة يا نفسى... مش هقدر أسامحك




ليه كدا يا سمر ليه تعرضينى لحاجة زى دى بس


أنا أسفة يا سمر... أسفة بجد ماكنش قصدى اجرحك


بس أديكى جرحتينى ... عاوزة اعرف عذرك ايه دلوقتى ... أنا خوفتك كتير... فهمتك و وعيتك... قولتلك اوعى تفرحى ... اوعى السكينة تسرقك... انتى اللى مسمعتيش الكلام


عارفة... و ندمانة ... أنا غلطت فى حقك كتير .. و انتى مالكيش ذنب ... أنا كنت فاكرة انى هقدر أسعدك


و اديكى معرفتيش... و كل يوم بتزوديلى همومى زيادة.. منا م الأول قولتلك بلاش يا سمر.. قولتلك خلينا كدا... مش عاوزين حد معانا.. وحدتنا كانت مريحانى اوى ... صحيح كنت لوحدى ..... بس كنت بكبريائى لسة يا سمر


يا سمر ماتعذبينيش و انا يعنى كنت اقصد أجرحلك كبريائك و لا حتى اخدشه.. أنا بس كنت زعلانة علينا و احنا مش لاقيين اللى نشكيله همومنا كنا لوحدنا اوى و حبايبنا بيتسرسبو من ادينا يوم عن يوم ... و جه قدامنا اللى يفهمنا و يحس بينا.. ماكنش ينفع لما مدالنا اديه اقوله لأ


أديكى اتصرفتى و قولتيله اه و فرحتى شوية و بعدين ايه النتيجة ... رجعنا بردو لوحدنا بس المرة دى دموع عنينا اكتر بكتير ... عشان انا دلوقتى مش بس زعلانة علينا... أنا زعلانة ع اللى بقى جزء مننا ... زمانه دلوقتى حزينووحيد زيننا ... كنا سيبناه فى حاله و سابنا فى حالنا ...


بس خدى بالك يا سمر... ماتنكريش انى عرفت أسعدك



قد ايه؟ يومين عشرة أسبوعين تلاتة ... و بعدين ؟ هنحزن قدامهم قد ايه؟ يا سمر لو كانت الدموع اللى نازلة من عينيكى دلوقتى دى هى تمن السعادة اللى أسعدتيهالنا... يبقى كان بلاش منها احسن ... أنا زعلانة منك عليكى


و أنا كمان زعلانة من نفسى عليا... أنا السبب بمشى ورا قلبى


و انا غلطت بردو عشان معرفتش امشى اللى فى دماغى عليكى و سبتك فى طريق السعادة ياخدك معاه ... بس بردو مش قادرة اسامحك و لا هقدر.... كان لازم يا سمر تحبينى أكتر من كدا


أنا أسفة يا سمر... كنت فاكرة ان خلاص معاد فرحتنا جه


أنا اللى أسفة يا سمر.... مش هقدر أغفرلك وجع القلب و الكرامة و الدموع اللى راحو مننا


أسفة

Wednesday 30 July 2008

لسة فيا الأمل يارب


يارب.. فى هذه الساعة التى لا تنسى من عمرى .. فى هذه الساعة التى تتنزل فيها لتوهبنا عطاياك و منحك .. فى هذه الساعة من الثلث الأخير من الليل.. أدعوك.. أدعوك يا كريم و يارؤوف و يا رحيم .. فلا يوجد ضمة تدفئنى مثل ضمتك.. ضمنى يا رب برحمتك و بفضلك .. أدفئنى يا رب .. أدفئنى فبرد الوحدة شديد.. برد قارص .. بل هو صقيع كاد أن يقتلنى .. ليس هناك من يشفينى من لهيبى .. نعم فداخلى يحترق فى هذا الصقيع.. احساس غريب ما أشعر به الأن .. فقدر ماأملك من الوحدة .. قدر ما أحتاج من الحنان و الحب ..

ياااااااارب .. كلمة واحدة بها كل أمالى أدعوك بها .. _اسعدنى_ اسعدنى يارب حتى و ان كنت سأبقى وحيدة .. اسعدنى بحبى لك و حقق أمالى و ان كانت فى خيالى .. حقق أمالى و اسعدنى يارب حتى و ان كانت هذه السعادة لحظة مثل هذه اللحظة ... اسعدنى يارب

Saturday 5 July 2008

فكرة جريئة


جايز تكون فكرة جريئة شوية فلسفية أوى بس كتير أوى سرحت فيها بشكل عميييييييييق و تعبتنى أوى لحد مااستسلمتلها و أمنت بيها تماما ايه بقا الفكرة دى ..... مفيش حد مش أنانى مفيش حد بيحب من غير أى مصلحة أو حاجة مفيش حد بيضحى عشان حد من غير فايدة شخصية هتعود عليه......


فكرتى جريئة و أكيد محدش ممكن يصدقها بس دى حقيقة


الحب =الحاجة


يعنى مثلا أنا بحب صحبتى الأنتيم ليه عشان بتسلينى بنخرج سوا بنتكلم بفضفضلها لما أدايق


الانسان اللى بيحب واحدة بيحبها عشان بتدخله فى عالمها و بتحكيله عن حياتها و بتقوله بحبك و بتهتم بيه و بتتنازل معاه عن حاجات مابتتنازلش عنها مع غيره و بتحسسه بالتميز


الطالبة اللى بتحب مدرسها مثلا بتحبه ليه؟ عشان بيفيدها و سعات يحكيلها و يكلمها و يحسسها انها كبرت خلاص و بقت قد المسئولية دى


احنا بنحب ندون ليه؟ عشان دا بيفرحنا و بيدينا ثقة و بيخلينا نطلع كل اللى فى قلوبنا


أقصد ايه .... اممممممممم



كل حاجة و حد الانسان بيحبهم فدا عشان نفسه


الصلاة اللى بتصليها عشان خايف على نفسك من ربنا

هتقولى لأ مش عشان خايف عشان بحبه

طب يا سيدى بتحبه و حبك ليه بيخليك تفرح لما تطيعه يعنى بردو عشانك



دفاعك عن بلدك قدام الأجانب اللى بيسيئولها

عشان انتمائك ليها و حبك لناسها و عشان هى مكتوبة فى بطاقتك

هتقولى لا أنا بجد بحبها و حبك ليها بيدفعك انك تدافع عنها


حبك لصديقك ممكن يكون سببه انه بيبكيلك و يشتكيلك من حياته

دا فى حد ذاته بيكسبك شعور انك مسئول عن تفريج هم شخص


الأم بتحب أولادها عشان الأمومة

الأمومة مش أخد الأمومة عطاء , الأم عندها حاجة للعطاء و بيسعدها


الراجل اللى بيتصدق على الفقرا بيعمل كدا عشان سعادته فى دا و بكدا بيستمتع

يعنى بردو عشان نفسه...


الزوج بيحمى زوجته و بيضلل عليها عشان يحس بالرجولة اللى ...... بتسعده



اللى عايزة أقوله ان من غير حاجة مفييييييييييش حب


لأن الحاجة ممكن تكون حاجة للعطاء و التضحية


حد فاهم حاجة ؟؟؟!!!!!





Sunday 29 June 2008

تأمل لحظة فى حال...................الدنياااااااااا


الزمن طفل صغير راح يعبث بفرشاه الصغيرة على رؤوسنا باللون الأبيض و أنشأ على وجوهنا خطوطا هى التجاعيد ... احنا ايه؟...........بجد احنا نسوى حاجة مهمة للدرجة اللى بنحسها؟........لو بصينا كويس هنلاقى الناس اللى زينا كتيييييييييير طبعا مقصدش الناس بتوع انهاردة لكن كل الناس من أدم عليه السلام لحد دلوقتى .....مش أناعندى 18 سنة؟ يعنى المفروض انى بالنسبة لحد عنده 60 سنة عيلة معندهاش أى خبرة بس اللى عندها 18 سنة دى خايفة و مرعوبة من ان السنين بتجرى و حسة انها فجأة و من غير ما تحس هتبقى زوجة و أم و جدة و أوبا تروح و محدش يحس بيها ... و على رأى هنيدى الدنيا من الدناوة يعنى بتضحك علينا و تشيلنا من مكان لمكان و من مرحلة لمرحلة و كل ماتعدى سنة نولع الشموع و نحتفل بأعياد ميلادنا و الحقيقة اننا قربنا من النهاية سنة كاملة ... مش عارفة ليه التفكير بالطريقة دى مسيطر أوى عليا اليومين دول يمكن فى الفترة الأخيرة ناس كتير أعرفهم ماتو مع انهم قريب جدا كانو قدام عينى و بيخططو للدنيا كأنهم مش هيخرجو منها أبدا يمكن كمان عشان ناس كنت بشوف منهم بس الحيوية و الشباب و الانطلاق و ببص فجأة لقيت رجليهم و ركبتهم وجعاهم م المشى و نظرهم بدأ يضعف و تجاعيدهم طلعت و شعرهم ابيض.... يمكن كمان عشان صحبتى و اللى كنت لسة باكل قريب جدا معاها مصاصة و ألعب مساكة و أجرى فى الشارع اتخطبت و كل تفكيرها دلوقتى فى ازاى تعامل أهل جوزها فى المستقبل... بسرعة كدا يمكن بردو لأنى فاكرة طفولتى كأنها امبارح بتفاصيلها .........يمكن و يمكن و يمكن..... المهم يعنى ان اللى بيجرو وراها دول مجانين أه مجانيييييييييين رسمى و لو بصو لها من الزاوية دى هيقولو مش عايزين منها غير رضا الخالق طبعا أنا مقصدش بدا اننا نبطل أحلامنا و طموحاتنا أكيد يعنى , ممكن أوى أحلامنا تبقى لهدف دينى و عشان نخدم بيه ديننا بس لو استحضرنا النية بس بجد المفروض على طول نتأمل حال الدنيا و نعرف ان جه قبلنا زينا و أحسن مننا كتيييييير و لسة ان شاء الله هييجى و لو دا على طول فى بالنا مش هيبقى فيه حاكم ظالم و لا تاجر جشع و لا طالب علم غشاش و مش هيبقى فيه سرقة و لا نصب و لا كدب و لا كبر و لا و لا و لا ,كله هيتصف بلأخلاق الحميدة و هتبقى تستاهل انها تتعاش الكام سنة دول

Tuesday 6 May 2008

ماذا عن الحب؟


الحب كلمة جميلة و احساس أجمل الحب بيغير لون الحياة و بيديها البهجة و الرونق الحب اللى بيه تحب كل حاجة كنت بتكرهها من غيره و اللى من غيره ماتحسش باللى كنت بتحبه معاه الحب حاليا عملة نادرة الوجود فى القلوب و كتير أوى بترددها الألسنة من غير احساس الحب هو الحرية فى الاختيار و التعبير عن الأحاسيس,و اللى بنترجمها لما يغضب الله سبحانه,و تبدأ الذنوب باسم الحب
الحب احساس طاهرو برىء بين شخصين متفقين فى المستوى الفكرى و الروحى ربما بين عنيهم أشعة غير مرئية و ربما بين قلوبهم مغناطيس بيقربهم
الحب مالوش أى علاقة بالمادية و الفلوس و الشقق و العربيات
الحب احساس ممكن التعبير عنه بوردةالحب مايحسهوش بجد غير قلب طيب و كبيرالحب هو اللى بيدى طعم لروتين الحياة الممل و بيخلق للانسان هدف جميل و نبيل فى حياته الحب لما تتجمع روح فى جسدين و عقل ف جمجمتين و قلب فى صدرين الحب بيهون علينا أعباء و هموم الحياةننسى بيه أزمة السكن و أزمة رغيف العيش و نعيش فى بيت رملة بنيناه ع الشاطىءو يطعمنا كل حنان و أمان الدنيا الحب علاقة رائعة لن تنجح أو تستمر بدون اقتناع عقلى و تفكير عميق و تأنى الحب احتياج و عطاء فى نفس الوقت و مايبقاش حب من غير غيرة و عذاب
عايز تعرف اذا كنت بتحب شخص أو لا؟
اذا توافر بينكم :الاحترام
الاخلاص
التضحية
اذا فهناك حب
يارب اسعد كل حبيبين و ابعد عنهم العين و سهلهم أمورهم عشان يبقو أجمل زوجين يارب عوض اللى مش قادر و مش عارف و خايف يحس بالحب و اديله حنان و أمان يكفى العالم و أوجد له نصفه الأخريارب اجعل الحب ف أمة الاسلام فى ظل طاعتك و تحت راية عفوك و رضاك

Monday 5 May 2008

نفسى من تانى نعود.....








أية صديقة عمرى و رفيقة دربى
حبى ليها عمرى ماأقدر أوصفه
عشنا مع بعض الطفولة و المراهقة و أدينا أهو داخلين ع الشباب
كل الناس كانو بيحسدونا على بعض و كانو بيسمونا هناء و شرين
و ياما خوفونى من ان صحوبيتنا دى هتقل خالص
لاكن يا سلام ع الحماس اللى كنت ببقى فيه و كنت بقول لااااااااااااااااا
مستحيل صداقتى أنا و أية تقل

كان سرى معاها و سرها معايا

كنا أغلى شخصين عند بعض
و فجأة ... و من غير ماأقصد و لا تقصد
بعدنا
يمكن السبب كلياتنا اختلفت
يمكن كل واحد بدأت تظهر ليه اهتمامات و علاقات جديدة
بس بجد مش عارفة أعيش و أية بعيدة عنى كدا
مش بس ماديا لا .. وجدانيا كمان
وحشتنى أوى حتى لما بشوفها على طول وحشانى
و ياترى لما صداقة العمر تقل كدا ... يبقى فى حاجة اسمها صداقة أصلا؟

أول مرة

بداية دى أول مرة أكتب كلام من قلبى فى مدونة

أول مرة طبعا أدخل مدونة

و سعيدة أوى بدا و أتمنى اللى هقوله يعجبكم و يوصل قلوبكم زى ماهو خارج من قلبى

عشان الامتحانات مش هقدر أدون كتير دلوقتى بس أوعدكو لما أفضى أدون كل اللى فى قلبى