Sunday, 19 April 2009

اقرار


مش عارفة ليه محدش بيعترف أبدا انه سعيد


مش عارفة ليه لما بنفرح بنخاف


نخاف نقول


نخاف نتأكد م الفرحة


بنخاف من مجرد الاحساس بالسعادة


ليه لما بتكلمنى أى واحدة من صحباتى بتكون دايما عايزة تشتكى و تعيط


ليه دايما لما بقلب فى المدونات و اتفرج عليها كويس بتجيلى حالة أسى غربية


طبعا من كمية الخواطر الحزينة و القصص المؤلمة و النقاشات السياسية اللى غاالبا بتكون محبطة


ليه الناس كلها مضايقة كدا!!!


و ليه لما بيفرحو مش بيقولو


ليه مش بفتح كراسة الشعر بتاعتى غير و أنا ف أسوأ حالاتى


مع انها بتكون لأسباب تافهة




أيوة أيوة.. أعترف انها تافهة


امبارح واحدة من أعز صديقاتى قالتلى.. أنا حظى وحش أوى فى الدنيا.. و محدش بيصدق ان الدنيا ملطشة معايا كدا


هههههههههههههههههههه


يعنى واحدة يادوب لسة مكملة 19 سنة انهاردة بالظبط.. كل سنة و هى طيبة :)


و ف كلية حلوة... و بنت جميلة ماشاء الله .. و مرحة.. و عندها صحاب كتير.. و صحابها بيحبوها


لييييييييه بتقول على نفسها كدا بس !!


على فكرة بقا انا اكتشفت حاجة.. اللى بيحزن.. بيكون عايز يحزن.. بيكون دا نابع من جواه


بجد و الله




أصل لو الواحد فرح أوى أوى بيشتاق للحزن.. بيحس انه عايز يعيط


و الله الناس دى حالها غريب أوى




مش عارفة سبب محدد لكتابة البوست دا


غير انى الحمد لله حاسة بالسعادة :)


من غير سبب.. الا انى عايزة أفرح و ليا مزاج أتبسط :)




شوفتو بقا الحكاية سهلة ازاى ؟




لو حسيت انك مخنوق من روتين الحياة الممل كلم صحابك و اخرج معاهم خروجة حلوة


لو صادفتك مشكلة حقيقية.. الجئلو.. ربنا قادر


هيمحى حزنك و يفرج همك و غمك فى ثانية.. بس انت ادعى بقلبك و الجئلو بجد




تعرفو انى جربت مرة نظرية الدكتور خشبة بتاع فيلم فئاد المهندس


بس طبعا ماقولتش انا مش قصير قزعة انا طويل و أهبل




لكن اليوم دا كنت مضايقة جدا جدا


من غير سبب مقنع كالعادة :)


و قعدت أقول لصحابى انا فرحانة


انا مبسوطة


انا مش عارفة مالى أكتيف اوى انهاردة و حاسة انى عايزة أخد الدنيا ف حضنى


قعدت أقول كدا لحد ما صدقت


و اتبسط :)


و قعدت أغنى بقا ألف ليلة و ليلة و جانا الهوا جانا


و فضلت سعيدة من تأثير الاقناع دا ييجى أسبوع


رقم قياسى مش كدا :)


ساعات بقعد مع نفسى و أقول مشكلتى ايه فى الحياة؟ ايه اللى بيخلينى أحزن؟


بابا مش عايز يخرجنى عشان أغير جو المذاكرة


ماما متنشنة معايا شوية


واحدة صاحبتى مقصرة معايا و مش بتسأل عليا


لسة ماعشتش قصة الحب اللى بحلم بيها زى أى بنت


و فيها ايه؟


ههههههههههههههه دنا تافهة أوى


الحاجة الوحيدة اللى المفروض تخوفنا على نفسنا و تقلقنا هى البعد عن ربنا


و حلها سهل


ركعتين و كام دعوة و مناجاة لربنا _و ما أجملها نعمة_ فى البلكونة


الحكاية هتخلص:)


بقولكو ايه.
أقر أنا سمر سمير و أعترف بكامل ارادتى و كامل قواى العقلية
أن:
. الدنيا حلوة... و الله العظيم حلوة :)

38 comments:

Sweet Violet said...

و انا كمان معاكى ان الدنيا حلوووة قوى

و مقتنعه جداااا ان الانسان هو اللى بإيده انه يفرح او يحزن او يكون فى اى موود هو عايزه

ربنا يديم عليكى السعاده ياقمر و الفرح

(:

mohamed ghalia said...

أنا سعيييييييييييييييييييد
من قالى كده
احنا الى بنصر نشوف الجزء الوحش بس
الدنيا حلوة والله بس نعيشها صح

صدى الصمت said...

كن جميلاً ترى الوجود جميلاً
والجمال هنا مقصود به طبعاً الجمال الدراخلى والصفاء النفسى
تحياتى

عاشقة الورد

refining_eng said...

بما ان دا اول تعليق ليا
فاحب انه يكون تعليق بيضحك
ههههههههههههههههههههههههه
بجد انا كمان متفائل ومش بحب النكد
وعلى راى محمود عبد العزيز فى فيلم الساحر
انا بحب اعدى على النكد كداااااااااااا
بس انا اسمى محسن مش بهجت
ههههههههه
كمان ضحكه
ياله مش خساره فيكى

yoyo said...

صباحك كله سعادة يارب

زى مايكون اتعودنا على الاحزان وحتى لو فرحنا نرجع تانى نشتاق للاحزان
باتفق معاكى ان بايدنا اننا نسعد انفسنا حتى لو كنا غرقانيين فى هموم الدنيا كلها برده لسه الدنيا جميلة بس احنا نحاول نفهم صح يا سمر

ربنا يسعدك و يسعد قلبك يارب

تحياتى
يويو

فكرة من الزمن ده said...

وانا فكرة بنت من الزمن ده اقر ان البوست ده جميل جدا وعجبني وغير مودي وحالتي على الصبح اشكرك بجد اجمل حاجة هي القرب من ربنا لما الدنيا تخاصمك قربي من ربنا هتلاقي الدنيا واخداكي بالحضن
تحياتي

Soul.o0o.Whisper said...

و أنا كمان

أقر أنا المدعوة سوووووول

إن الدنيا حلوة

والله العظيم حلوة

بس الكئيب كئيب ولو جبت له كيلو زغزغة

و الفرحان فرحان ولو جبت له كيلو دموع

:)

ياللا يا عم و لا تزعل


و انتى عارفة يا سمورة كمان

ان اللى عملتيه دا أحد أساليب التنمية البشرية

ايوا

انك تقنع نفسك بحاجة معينة

مثلا عاوز تنام

تفضل تقول

لالا أنا مصحح
أنا تمام
هو أنا مش عاوز انام ليه؟؟؟

هههههههههههههههه
((كنت باعملها ايام الامتحانات

أنا فرحان
انا مبسوط
أنا سعيييييييييد



هى الدنيا بمبى ليه؟؟
هههههههههههههههه



تحياتى لبوستك الروووووووعة يا أحلى سمورة

و خليكى كدا على طول

كيــــــــــــارا said...

وانا مقتنع ان الدنيا حلوه

بوست في وقته فعلا ياسمر

اسماء واحلام فى وجدانى said...

انا معاكى فى كل كلمة قولتيها

فعلا الحياة حلوة وحلوة اوى

وفعلا الحزن ينحب اوى لسبب بسيط ان

عُمره اطول من عُمر الفرح

Nour said...

السلام عليكم..

مدونتك جميله ,,
وبالفعل الدنيا حلوة ولكن حسب الزاوية التى ننظر من خلالها الى هذه الدنيا..

دمتِ بخير..

Nour said...

السلام عليكم..

مدونتك جميله ,,
وبالفعل الدنيا حلوة ولكن حسب الزاوية التى ننظر من خلالها الى هذه الدنيا..

دمتِ بخير..

dr_samarmar said...

Sweet Violet

و يكرمك يارب و يسعدك و يسعد جميع المسلمين اللهم أمين :)

شكرا ع التعليق يا جميل :)

dr_samarmar said...

mohamed ghalia

يارب نعيشها صح :)

أشكرك ع التعليق :)

dr_samarmar said...

صدى الصمت

تعليق جميل و عندك ألف حق:)

dr_samarmar said...

محسن

متشكرة ع الضحك دا كله
و الله دا كتير اوى عليا :d

dr_samarmar said...

يويو
شكرا ع الدعوة الجميلة دى و لك بالمثل يارب

فعلا احنا للأسف بنشتاق للحزن و كأن فى الشجن راحة خفية

تحياتى يا جميل :)

dr_samarmar said...

فكرة

شوفتى يا ستى

عشان ماتقوليش حرمتك من حاجة بقا :d

تعليقك اللى فرحنى بجد :)

dr_samarmar said...

سول
___________________
بس الكئيب كئيب ولو جبت له كيلو
زغزغة

ههههههههههههههه
____________________
بس شوفتى يا سول طلع دكتور خشبة عندو حق و مش بيضحك علينا :)

dr_samarmar said...

كيارا

اللهم أدمها علينا نعمة و لا تحرمنا منها اللهم أمين :)

مفيش أحلى من الرضا اللى حسيته ف كل الردود ع البوست و بالذات ردك يا كيارا

و يشرفنى ان البوست هو اللى أظهر الرضا داو:)

dr_samarmar said...

أسماء و أحلام فى وجدانى

_____وفعلا الحزن ينحب اوى لسبب بسيط

ان

عُمره اطول من عُمر الفرح

__________

و تفتكر دا سبب مقنع لحبه ؟؟!؟

dr_samarmar said...

نور

صح دا بالظبط اللى كنت عايزة أوضحه

ان حسب نظرتنا احنا للدنيا بتتلون قدام عنينا :)

اسماء واحلام فى وجدانى said...

البنى ادم عموما

بيحب الحاجة اللى تعيش معاه اكتر

ومن غير ما يفكر الحاجة دى

هتضره او هتنفعه

وده مجرد راى

ممكن يكون صح وممكن يكون غلط

*********
انا اسف على التاخير ده كله

صدفة جميلة said...

بقولك اه صحيح قبل مقول باى يارب يوصلك كلامى وتعرفى احنا لية بنحب الحزن لاننا بنخاف ننصدم ونجرب الفرح لاننا لو جربنا الفرح ورجعنا للحزن تانى ممكن نموت او على الاقل يحدث زى محصل لية انك مش تصدق حد ولا يوم تحب حد لان الزمن دا مافيش فية حب ممكن خداع ممكن نادر لما تلاقى حد بجد يستاهل يكون حاجة بجد فى حياتك يارب يارب تشوفى كلامى هستنى رد منك على فكرة انا مش بعبع ولا كداب كداب انا الحمد لله بس حبيت اعرف الناس اه ممكن يكون واعرف مين يستاهل يكون منى ويكون اخ بجد

dr_samarmar said...

أسماء و أحلام فى وجدانى

غالبا هى فكرة حضرتك اللى صح
أصل ايه اللى هيخلينا نتمسك بالحزن غير كدا !!

و على فكرة.. أنا اللى أسفة ع التأخير :)

dr_samarmar said...

صدفة جميلة


اللى فهمته انك عملت خطة علشان تعرف مين كويس و مين مش كويس و مش صديق حقيقى

و كويس انك نجحت ف خطتك :)
ألف مبروك :)

بالنسبة للموضوع نفسه فممكن عندك حق
أصل الدنيا زى موج البحر
يوم فووووق
و يوم تحت
فبنفضل نفضل تحت و خلاص بدال مانطلع و ننزل :)
بس دا تفكير غلط :)
و كويس ان حضرتك وضحتلى ان البوستا للى كاتبه دا كدبة
كدبة ابريل بقا :D
شكرا.. نورتنى بوجدك.. سلام عليكم

blue-wave said...

ربنا يديم عليكى الفرحه والسعادة والتفاؤل دا
بس برضه
دارى على شمعتك تقيد:))

dr_samarmar said...

ماهو غالبا دا السبب
:D

بنخاف نتحسد :D

بس حتى الحسد.. غالبا.. غاااااااالبا.. بيكون وهم و احنا اللى عايزين نصدقه و نعلق عليه حجات كتير :)

ربنا يسعدنا كلنا يارب :)

الازهرى said...

انا شخصيا باعتبر نفسى دايما اسعد انسان
تعرفى ليه
لان ربنا رزقنى حاجات جميلة كتيرةة جدا
صحيح اختبرنى برضه وابتلانى بحاجات تانية لكن الحمد لله
باصبر واحمد ربناوبكده برضه اكون كسبان
شفتى المعادلة سهلة ازاى

ربنا يديم عليكى السعادة يااارب

dr_samarmar said...

اللهم أمين و لك بالمثل
و ربنا يديم عليك رضاك بقضاء الله و أحكامه يارب :)

نورتنى

أسوور said...

بنعمل فيلم تسجيلى إستقصائى بالجهود الذاتية يهدف لرصد ظاهرة التحرشات فى الشارع المصرى
الفيلم لا يتبع أى جهة رسمية أو قناة فضائية أو محلية ولا أى مركز ابحاث
*******
طبيعة الفيلم تقوم على متابعة عدد من الفتيات والسيدات على الطبيعة أثناء سيرهم فى الشارع بالكاميرا
لمدة 5 دقائق .. وتصوير المضايقات التى يمكن أن يتعرضن أثناء سيرهن فى الشارع على الطبيعة
ثم يتم حصر عدد المضايقات بالنسبة لعدد الفتيات أو السيدات محل الدراسة
*******
مطلوب متطوعات لتصوير الفيلم

سارة نجاتى said...

ايه التفاؤل الفظيع ده ؟؟

ربنا يزيدك يا سمرمر

بس أنت حطيبتى ايدك ع النقطة فعلا

مهما فرحنا مش بنعترف

بس يتيهيأ لى احنا نخاف نعترف بيها لتروح مننا

عشان منقرش على نفسنا بالبلدى يعنى هههههههههه

فكرتينى بواحد زميلنا على طول منشكح بيقول الحزن ده طاقة انت بتطلعها و لو عاوز تطلع طاقة غيرها ( ايجابية يعنى) ح تطلع

عجبنى موضوعك يا سمورة

تحياتى

mosooz said...

هى فعلا الدنيا جميلة وحلوة ..واللى مش شايف كدة دا بيبقى عايز كدة

مفيش حد معندوش مشاكل ..والمشاكل مبتنهتيش..فلو الواحد مسك على كل مشكلة وكبرها..مش هتنتهى ..ومش هنشوف السعادة..أبدا.

فالناس بتحزن لية بيشوف الجزء اللى فية المشكلة ..ويكبة فى نظرة ..فيبقى حزين.

اما اذا ظر بنظرة تفائلية ..الى كل حاجة كويسة اكيد هيبقى سعيد.

والسعادة اكيد اكيد فى طاعة ربنا.

موضوع جميل ورائع
تحياتى

فشكووول said...

د. سمرمر يا عسل
دكتوره سمرمر يا قمر
دكتوره سمرمر يا سعيده
انت سعيد
انت مبسوطه
اني حلوه
انا جايب لك مود جميل جدا اهه يعنى مش عندى غلط خالص
الشعب المصرى يا دكتوره من كتر القهر اللى عاشه واللى عيشوه فيه الحكام من ايام الفراعنه ولحد الوقت ولم يتمتع بيوم واحد عسل
الشعب دا خايف
حتى لما بيفرح خايف يبين الفرح
عشان خايف ان بكره مش يستمر الفرح وينقلب زعل
عشان هو اتعود على كدا تاريخيا
عارفه لما الانسان يضحك ويفوق من الضحك يقول ( اللهم اجعله خير) لاننا لا نثق فى الان الافراح مستديمه من تجربتناالتاريخيه
تحياتى

dr_samarmar said...

أسوور

بصراحة ان صعب أقدر أفيدك فى الموضوع دا و صعب أصور كدا بصراحة

بس هى الفكرة ايه هدفها بالظبط يعنى؟
انا مش فاهمة بجد سببها ايه و ايه اللى هنستفيده

ما أحسن مانحاول نرصد نسب و أشكال مختلفة للمشكلة اللى خلاص عرفناها و رصدناها كتير
ما يلا نشوف حل بقا و دا الأهم
و لا ايه؟
منورانى و بالتوفيق باذن الله

dr_samarmar said...

سارة نجاتى

______________
فكرتينى بواحد زميلنا على طول منشكح بيقول الحزن ده طاقة انت بتطلعها و لو عاوز تطلع طاقة غيرها ( ايجابية يعنى) ح تطلع
________________

الله يا سارة الله
أهو كدا بقا

الجملة دى رائعة و ياريت تشكريلى زميلكم عليها :D

ياريت نطلع كل طاتنا فى الافرحة.. دا حتى بيقولو السعادة بتطول العمر و تساعد على بطء ظهور التجاعيد

dr_samarmar said...

mosooz
______________

والسعادة اكيد اكيد فى طاعة ربنا.
________________

حضرتك كدا بقا بجد بجد يعنى جبت الخلاصة :)

dr_samarmar said...

فشكووول

:$ :$ :$

ربنا يخليك يااااارب يا أستاذنا و عمنا كلنا :)

كل موضوع حضرتك بتعلق عليه و بتنظرله من الزاوية التاريخية

و طبعا كلام حضرتك مافيهوش كلام

منورنى جدااااا

تحياتى :)

micheal said...

يا ريت أعرف أعمل زيك كده بنفس الطريقة
محدش بيحي يحزن ..صدقيني
:)
تحياتي