Monday 19 January 2009

قضية الاختلاط ما بين التشدد و التسيب


أرهقنى التفكير و استهلك منى الكثير من الوقت كى أصل الى نتيجة فى هذا الأمر الشائك,و لكن,دون أدنى فائدة

فقد أصبحت قضية الاختلاط و مدى شرعيتها تشكل بالنسبة الى أمر محير,بل أوشكت أن تصل معى الى عقدة نفسية

فوجهة نظرى تختلف عن وجهة نظر غيرى و وجهة نظر غيرى تختلف عن وجهة نظر غيره...و لا أعرف حتى الأن وجهة نظر الدين فى ذلك..أو بمعنى أدق أخاف أن أعرف..أو بمعنى أصح أعرفها و لا أقتنع بها أو نقول لا أريد أن أقتنع بها أو ربنا أريد و لا أستطيع...لا أعلم

أعلم أن أوامر الله و نواهيه لا يصلح أن نفكر فيها و يجب أنا ننفذها بدون أى تفكير لأن الله له حكمة فيها لا نعلمها

و لكن..فى هذا الأمر بالتحديد لا أعلم ما هو رأيى فى هذا الموضوع لكى أعلم أهو مخالف لرأى الدين أم مماثل له..نعم..اننى لا أعلم رأيى حتى الأن

فأنا أغيره_فى هذا الأمر_فى اليوم مرتين أو ثلاثة و أغير أسلوبى فى التعامل عدة مرات فى الأسبوع الواحد..هل أنا مجنونة ؟؟؟؟؟؟؟؟؟؟؟

فى يوم ما .. أكون الفتاة التى لا تتحدث اطلاقا مع الجنس الأخر و أقصى علاقاتها به هى أن تسأل السائق عن الأجرة أو تسأل المعيد عن لون مادة كيميائية معينة

و يوم أخر أتغير..الى الفتاة التى تقول الى الفتاةالثانية التى تقول صباح الخير لزميلها فى الجامعة و تقف هى و أصدقائها مع أخا لصديقتها يتحدثون فى شتى أمور حياتى و التى تتصل بمدرسيها من المرحلة الثانوية و تطمئن عليهم و تسرد لهم أخبارها و التى عندما تقابل أبناء أعمامها و بنات أعمامها يمزحون جميعا و يضحكون و عند زيارتها لأحد الجمعيات الخيرية تتحدث مع من فيها من الجنس الأخر و تحكى و تتكلم _!!!و لا كأن فيه حاجة


أشعر أن شخصيتى تميل أكثر الى الفتاة الثانية ..التى تأخذ الحياة ببساطة و تتكلم مع من تشاء و تصمت مع من تشاء و لكن بالطبع بحدود..و و الله حدود صارمة ..فهى لا تسلم باليد على رجال و لا تخضع بالقول أبدا.....و يكون كلامها فى منتهى الاحترام

و لكن وجهة نظر الدين التى أستمع اليها ممن أثق تعترض على هذا فيجب أن يكون الاختلاط فى أضيق الحدود ..و من الخطأ أن أفعل كما فى الفتاة الثانية من تصرفات

الفتاة الثانية تتصرف بكل بساطة فتصطدم برأى الدين فتتكلف مرة أخرى لتكون الفتاة الأولى المتشددة

أريد أن أعرف حقا فقد تعبت و أوذيت و نقدت كثيرا من نفسى و غيرى بسبب هذه الازدواجية

هل الأمر أبسط من هذا؟أم هو خطير و معقد و شائك فعلا؟

هل يجب ألا أتكلم مع رجال الا المحارم؟

أم أن زميلى فى عملى أو دراستى له الحق فى أن أتكلم معه أو على الأقل ألقى عليه السلام؟

أريد أن أعرف..أريد أن أستقر..أريد أن أقرر القرار النهائى و أعلم ...من سأكون!!!؟؟؟؟

53 comments:

Fatma said...

اعملي اللي قلبك بيحس انه صح

الصح صح والغلط غلط

انتي الوحيدة اللي هتبقى عارفه من جواكي اللي انتي بتعمليه دا صح ولا غلط

المهم انك تكوني صريحة مع نفسك وماتوجديش لنفسك مبررات وما تضحكيش على نفسك

الصح صح وواضح

انا ضد عزل الذكور عن الاناث وان تكون المعاملة بينهم زي التعامل مع كائنات فضائية

وضد التسييب والمسخرة والانفلات

في حاجة صح في النص

اكيد في حاجة صح في النص

حاجة اسمها اننا نختلط واحنا في دماغنا ربنا وبابا وماما ونفسنا عشان ما نظلمهاش

ربنا يحميكي

dr_samarmar said...

متشكرة أوى يا فنون ع الزيارة و الكومنت

و الحمد لله و الله انا لما بختلط براعى دينى و بابا و ماما و نفسى عمرى ما ظلمتها
و و الله تعاملى بيكون فى منتهى الاحترام وا لله

بس فى ناس بتعترض على دا...و شايفة ان الصح ووجهة نظر الدين...هى نظرية الكائنات الفضائية !!!

و مصرة ان دا الصح

Dr.Mohammed Gohary said...

متشكر على المرور
مدونة كديكور
أكثر من رائعة
لن أجاملك فلم أقرأ ما بها من موضوعات
عجبتني محتويات السايدبار

أعدك بزيارتك مرة أخري
ولكن بعد الإمتحان
دعواتك

فشكووول said...

سمرمر يا بنتى
انت محيره نفسك ليه .. يا بنتى الحلال بين والحرام بين وبينهما متشابهات .. استفتى قلبك .. قولى لقبلك يا قلبى انا اكلم هذا عن هوى ام لا .. واذا كان عن هوى .. هنا يقع المحظور .. واذا كان لا .. فالحمد لله لا محظور ولا يحزنون
رسولنا الكريم اخضع كل شيئ للنيه .. شوفى نيتك ايه .. انما الاعمال بالنيات ولكل امرؤ ما نوى .. وباقى الحديث انت عارفات .. امسكى الحديث ده وحطيه قدام عقلك وقيسى عليه اعمالك .. ولا تغلبى نفسك

Soul.o0o.Whisper said...

سمرموووور

أولا ربنا يكرمك و يوفقك
و يطمنا عليكى يارب

شدى حيلك فى الامتحانات


ثانيا : بصى يا سمرموووورة
انا بردوا تعبت فى النقطة دى
الناس كلها تقعد تقول الاختلاط حرام حرام حرام
طيب ..ماشى عرفنا انه حرام
بس احنا الوقتى فى مجتمع اساسه اصلا الاختلاط
يعنى مش حاجة دخلية عليه
بدل ما نقعد نقول الاختلاط حرام
نعرف فقه الاختلاط
عشان مش نقع فى غلط
بس للاسف مش لقيت حد يقوللى


شوفى يا سمووورة
بالنسبة للجامعة عامة
فللأسف و باقولهالك ان معظم الشباب بنات وولاد بيبئوا عاوزين بس الوقفة و الكلام
يمكن فعلا مش فى نفسهم شئ
بس هما واقفين لمجرد الوقفة و بيتكلموا لمجرد الكلام
فاهمانى
لأن دا هو مود الجامعة عندهم
و بكدا يبئا انت عايش حياتك صح

أنا الحمد لله فى الجامعة كانت علاقتى بزملائى الولاد تكاد تكون معدومة إلا فى السكاشن لو عزت منهم أو عازوا منى شئ
أو فى الامتحانات أيام الشفوى و كدا

و التعامل بيا دكتور و يا دكتورة
(( جامدة جامدة يعنى ..هههههههههههه


إنما بعد كدا لما بتخرجى لدنيا الحياة و الناس
لازم لازم تتعلمى ازاى تتعاملى مع كل اصناف البشر و كل المستويات
و هتلاقى ان حياتك أصلا عبارة عن اختلاط فى اختلاط
هههههههههههههه
بس انتى معاكى الرخصة بصفتك صيدلانية
يعنى المفروض هتلاطفى المريض و تسأليه عن أحواله تبتسمى فى وشه
فاهمانى

و لما أشتكيت دا كله لواحدة من اللى أحسبهم على خير
قالت لى هى الحياة عاوزة مننا كدا
اهم شئ يكون ضميرك حى ، وواعية للى بتعمليه و تقوليه
لا يخرج عن حدود الدين و الادب

و الحمد لله باحاول والله
والله المستعان

طولت عليكى أنا عارفة
بس بجد فعلا الموضوع مش كدا
و كل عصر و كل دولة لها فقهها
ياريت فعلا نتعلم عشان مانغلطش



خالص ودى يا قمر

بنوتة said...

والله يا سمرسمر الحلا بين والحرام بين وانا طبعا مش هأقدر أفتيكى بس ربنا قال "ولا تخضعن بالقول حتى لا يطمع الذى فى قلبه مرض" يعنى الاية واضحة وصريحة الكلام المهم الضرورى مباح ولكن بشرط الادب والاحتشام وكمان انت ذكرتى نقطة السلام السلام ده لربنا بس مش سلام هااي وصباح النور والفل تحية الاسلام السلام عليكم وطبعا مسألة السلام باليد دى محسومة حرام ده رأى الشخسى المتواضع وطبعا أنا مش بفتى انا بس حاولت أرد على سؤالك وأعسفة على الاطالة

dr.lecter said...

زي مافنون قالتلك

الحلال بين والحرام بين

اهم حاجه انت هتعرفي تتحكمي في نفسك ولا لا وتقدري تعملي حدود لكل حاجه ولا لا

اهم حاجه ان تعرفي تقفي في وسط التيار باقدام ثابته

الاختلاط
له ضرورات وله محظورات ومش انا ولا غيري اللي هيقولك عليهم

مشكلتكم انكم فاكرين ان الاختلاط بيبتدي في الجامعه مع انه بقي متوافر حاليا علي النت والمدونات والمنتديات والفيس بوك

اهم حاجه انك تستفيدي مش مجرد تقليد اعمي او ضعف انثوي تحت الضغوط

حياتي كلها لله said...

فالحجاب في أخص وأعمق معناه هو: الفصل بين الجنسين فصلا تاما.. فلا يلتقيان إلا لعرض طارئ لا بد منه، لا أن تيسر السبل، وتفتح الطرق لأجل وقع هذا الالتقاء.

وعلى هذا، وبهذا جاءت الشريعة:

- قال تعالى: { وإذا سألتموهن متاعا فاسألوهن من وراء حجاب ذلكم أطهر لقلوبكم وقلوبهن}..

فمنع السؤال إلا من وراء حجاب.. أي يكون ثمة حائل بين المرأة والرجل.. وهذا منع للاختلاط..

- قال تعالى: { قل للمؤمنين يغضوا من أبصارهم ويحفظوا فروجهم ذلك أزكى لهم إن الله خبير بما يصنعون * وقل للمؤمنات يغضضن من أبصارهن ويحفظن فروجهن}.

فأمر بغض البصر.. وغض البصر محال في الاختلاط.. فدل على تحريم الاختلاط..

- قال عليه الصلاة والسلام: ( المرأة عورة).. وكونها عورة.. أي لا يجوز النظر إلى زينتها وشيء من جسدها.. والاختلاط معناه النظر إلى كل ذلك..

- صفوف النساء كانت في مؤخرة المسجد خلف صفوف الرجال، فالنساء كن يصلين مع بعضهن، ولم يكن يشاركن الرجال في الصف.. والرجال مع بعضهم، لا تجد رجلا داخلا في صفوف النساء، ولو كان الاختلاط مباحا، لكانت صفوف الصلاة أولى وأحسن مكان لذلك، حيث إن كل مصل إنما يأتي ليطلب المغفرة والرضوان، لا لأمر دنيوي..

فلم جرى الفصل بين الجنسين بهذه الطريقة، حتى في هذا المكان المقدس، الطاهر؟..

- كان النبي صلى الله عليه وسلم إذا انصرف من صلاته صبر ولم يلتفت إلى الناس، والناس مثله، فإذا التفت إليهم كان ذلك إيذانا لهم بالإنصراف، كان يفعل ذلك حتى ينصرف النساء أولا، ثم الرجال ثانيا، حتى لا يقع الاختلاط عند باب المسجد، وفي الطريق..

- كان للنساء يوم يأتيهن فيه رسول الله صلى الله عليه وسلم ليعلمهن أمور دينهن، وله مع الرجال أيام يتعلمون فيها..

فلم لم يجمع الرجال والنساء، ليتلقوا جميعا؟..

- لما رأى النساء يمشين في وسط الطريق قال: ( ليس لكن أن تحققن الطريق، عليكن بحافته).. أي ليس للمرأة أن تسير وسط الطريق، بل تدعه للرجال.. وهذا منع للاختلاط حتى في الطرقات..

- قال عليه الصلاة والسلام: ( ما تركت بعدي فتنة هي أضر على الرجال من النساء)..

والاختلاط معناه اجتماع المرأة والرجل في مكان واحد.. وهذا مناف لمعنى الحديث:

فكيف يجمع بين الفاتن والمفتون في مكان واحد؟…


--------------------------------------------------------------------------------

كل هذه الأدلة وغيرها لا تدل إلا على شيء واحد: هو أن الشريعة جاءت بالفصل التام بين الجنسين، وهو ما نسميه بالاصطلاح الحادث: منع الاختلاط.

بعد ذلك يأتي المتحذلقون ليقولوا:

- إن كلمة الاختلاط ليست شرعية..

- وأن الاختلاط كان في عهد النبي صلى الله عليه وسلم.

- وأن المحرم إنما هو الخلوة.؟؟!!!..

dr_samarmar said...

دكتر محمد الجوهرى

متشكرة أوى و ربنا يوفقك فى الامتحانات باذن الله

dr_samarmar said...

عمو فشكول

متشكرة أوى ع الزيارة اللى نورتنى :)

انما الأعمال بالنيات و لكل امرىء ما نوى

و أهم حاجة انى أكون بتكلم مش عن هوى

يبقى هكون الفتاة التانية... اللى بتتعامل و بتتكلم بحدود...و اللى ناس بتشوفها غلط و لازم تكون أكثر تشدد بكتير من كدا !!!!

dr_samarmar said...

سول

أنا و الله مش أقصد بالكلام هو مجرد الوقفة بس و الكلام ع الفاضى و المليان

لكن أنا أقصد انى ممكن أكون عارفة زميلى و هو عارفنى و لما أشوفه أسلم

يسألنى بعد النتيجة عملتى ايه مثلا
و دمتم...

علاقات سطحية سطحية سطحية لأبعد الحدود

بالنسبة لولاد عمى مثلا... دى لوحدها حكاية .. احنا عيلة و بجد بجد احساسنا ببعض أخوى تماما مية مية .. بنطبق الشرع من حيث انى مش بسلم مثلا على حد فيهم بالايد لأنى عارفة و متأكدة انو حرام و ملتزمة باللبس الشرعى قدامهم

لاكن بنتكلم و نهزر و بنحكى لبعض كل حاجة زى الاخوات

المفروض ان دا غلط يعنى ؟؟ أنا دماغى وجعتنى و الله و هتجنن شكلى :D

dr_samarmar said...

بنوتة

بس عايزة أسئل سؤال

هو الأية اللى انتى ذكرتيها دى

ياترى فهمى ليها صحيح

أنا أعرف ان أخضع بالقول دى يعنى المياصة و الدلع و كدا

و أنا ماقولكيش بجد راجل يعنى فى المواقف اللى زى دى :d

يارب أكون فاهماها صح :$

نورتينى :)

dr_samarmar said...

دكتر ليكتر

طبعا عارفة أتحكم و طبعا عاملة حدود و قوية الحمد لله

و مش تقليد... و مش ضعف أنثوى...خااالص... أنا أصلا تركيبة شخصيتى مش بتميل للاختلاط.. لاكن بقول يعنى لما الظروف اضطرتنى أقف مع حد لازم أكون ذوق و لما أشوف حد أعرفه لازم أسلم عليه....مش مجرد الوقفة خالص و الله و لا الكلام من غير سبب

بس ساعات بتحط ف مواقف بتخلينى لازم أتعرف على حد م الجنس الأخر


و عارفة ان الاختلاط مش بيبدأ فى الجامعة بس

بالنسبة لى مش بس النت .. أنا زمايلى فى الدروس كنت أعرفهم و حتى الأن ساعات بيشوفونى صدفة فى الكلية و بيسلمو عليا

لاكن أنا ملقتش اللى يعترض على دا غير بعد ما دخلت الجامعة... و لما بحكى لبعض الناس من صديقاتى على ردود الأفعال اللى بتقولى بلاش اختلاط

بيبرقو و يستغربو جدا

و واحدة منهم قالتلى باللفظ.. سمر سمير تتقالها الجملة دى... دانتى لما بتقولى سلامو عليكو بنعمل عليها فرح

شكرا لمرورك و الكومنت

dr_samarmar said...

سلمى

قال عليه الصلاة والسلام: ( المرأة عورة).. وكونها عورة.. أي لا يجوز النظر إلى زينتها وشيء من جسدها.. والاختلاط معناه النظر إلى كل ذلك

الاختلاط معناه النظر الى زينة و جسد المرأة :$؟؟؟؟؟؟؟؟

لا طبعا يا سلمى انتى أكيد متأكدة تماما ان مش دا الاختلاط اللى بقصده
و كلامى وضح كدا أكثر من مرة




منع السؤال إلا من وراء حجاب.. أي يكون ثمة حائل بين المرأة والرجل.. وهذا منع للاختلاط..

لو كدا يا سلمى.. يبقى المفروض يتمنع أى كلام بين أى بنت و قرايبها على سبيل المثال
و المفروض كل بنات الأسر المتدينة يدخلو مدراس أزهرية علشان فى الجامعة مايكونش فيه اختلاط لا مع معيدين و لا زمايل و لا حاجة خالص بقا


بالنسبة لقضية غض النظر..فلو غض النظر يعنى منبضش خالص بأى طريقة م الطرق حتى لو مافيش أى حاجة داخلنا أو فى نفسيتنا .. ماينفعش نشوف حد فى التليفزيون خالص بقا... و لا دا ضرورة؟


لم جرى الفصل بين الجنسين بهذه الطريقة، حتى في هذا المكان المقدس، الطاهر؟..

و الله يا سلمى أنا اللى أعرفه و اتربيت عليه ان دا لأن المرأة و هى بتصلى بتوطى فى الركوع و السجود و عشان كدا ماينفعش راجل مش محرم يدخل عليهم.. و الله أنا دا اللى أعرفه وا لله وا لله


النساء فتنة على الرجال.... أه طبعا... معاكى .. و بتشوفينى بثور قد ايه لأوضاع غلط بشوفها جوا الكلية أو براها
لاكن تفتكرى النساء بيكونو فتنة على الرجال لما بيكونو ملتزمين بحجابهم الشرعى و عنيهم غالبا فى الأرض و مابيتكلموش فى أى حاجة تمس القلب و بيتكلمو فى منتهى الاحترام سواء من حيث الألفاظ أو الموضوع أو الطريقة نفسها!!!!


دى تبقى فتنة ازاى دى!!!على أى أساس بس !





بعد ذلك يأتي المتحذلقون ليقولوا:
- إن كلمة الاختلاط ليست شرعية.
وأن الاختلاط كان في عهد النبي صلى الله عليه وسلم.
وأن المحرم إنما هو الخلوة !

معلش بس بعيدا عن أى حاجة ... يعنى ايه متحذلقون :D
يابنتى ماتكلمينى عربى :D

أنا فعلا عارفة ان المحرم هو الخلوة
و خصوصا ان فى فترة الخطبة فى حاجة اسمها الخلوة الشرعية و هى أن الرجل و المرأة بيقعدو لوحدهم خالص بس بيكون فيه حد شايفهم لاكن مش سامعهم

أنا مقتنعة تماما يا سلمى ان اللى فعلا محرم الخلوة
أو الكلام اللى بيكون فيه مياعة أو كلام بقا فى الرومانسيات و كدا


طب هسألك سؤال... ليه فى بنات و ولاد بيقولو الاختلاط بكل أنواعه حرام.. و بعدين لما بيتخطبو بيتكلمو ساعات فى التليفون و بيقعدو يبصو لبعض بقا أثناء الخطوبة و دى حاجة بتحصل فى بيوت كتير لاغض نظرو لا حاجة
طبعا بيلتزمو ببعض المبادىء زى عدم السلام بالايد و زى منع أو تقليل الكلام الرومانسى.. لاكن الواقع بيقول ان بتحصل فتنة..و كبيرة.. و مش عاوزين نكدب على بعض و نقول لا و أكيد انتى شوفتى دا بعينك

سؤال تانى
زى ما سول قالت كدا
احنا بطبعنا صيادلة لازم و حتما و لابد نتعامل مع الجنس الأخر دا أكيد هيحصل
أى بنت محترمة بتتعين فى شركة لازم بيكون ليها كلام مع زملائها فى العمل
أى بنت ليها قرايب من الجنس الأخر.. تمنع الكلام معاهم؟؟
بقا دا معقول بردو

قوليلى بس يعنى ايه متحذلقون أهم حاجة :D
شتيمة يعنى و لا ايه؟؟؟ :d

أنا شايفة ان الحياة أبسط من كدا طالما مش بعمل حاجة حرام و لا فيها فتنة و لا تغضب أمى و أبويا و لا تخلى أى حد ياخد عنى انطباع مش كويس
الناس حواليا عارفة مدى احترامى لنفسى مع الناس و ازاى أنا راجل فى تعاملاتى بجد.. و انا من جوايا مش حسة ان دا غلط

دا شىء وارد و الزمن اتغير :$

و ربنا يهدينا جميعا

سمرمر

بنوتة said...

أيوة يا سمرمر الخضوع في القول هو اللين في القول يعنى زى ماقلتى بالضبط

dr_samarmar said...

طيب الحمد لله:)

حياتي كلها لله said...

السلام عليكم

سمرمر
أه يا بنتي مالك أخدت الكلام علي أعصابك كده ليه بس ..

علي فكرة مش أنا اللق قايلة الكومنت اللي فات ...أنا لما قريت البوست بتاعك طبعتلك من علي النت بالنص كلام و رأي شيخ من علماء الأزهر و خو شيخ كبيييير علي فكرة ..و كان كاتب رأي الدين في موضوع الإختلاط ...فنقلتهولك بالنص ..

أنا لسه موصلتش لدرجة أني أفتي

أنا مقرتش ردك بتركيز و مش كله كمان بس اللي قريته في كلااام كتير مش عاجبني و حاسة أنه في مفاهيم كتير عاوزة أناقشها معاك ..بس معلش بعدين

علشان الموضوع ده حيطولو أنا مش حينفع دلوقتي

لو عازة الموقع ..أبقي أجيبهولك و هو في مناقشة علماء مطولة عن الموضوع ده بس أهم حاجة الأول يكون عندك أستعداد للإقتناع برأيهم

سلام يا قمر و شدي حيلك في المذاكرة و أفتحي موبايلك بقي

سلاموكا

Asmaa Fathi said...

فعلا استفتى قلبكى فان افتكى فاصنعى

بس يكون لبك صادق معكى ولا يميل الى هوى

انا معى زمايل كتير فى الجريده وبنتعامل مع بعض بكل احترام

وسألت قبل كده عميد الكلية بتاعتى وهو حد على قدر كبير من التفقه فى الدين وقال مادام لا يوجد من يتخطى حدوده فلا بأس

كما اننى ممن لا يجيدون قطع علاقتهم بالاخر

يعنى مثلا مينفعش اشوف مدرس كان بيدينى من ايام الابتدائى او الاعدادى او الثانوى واعمل نفسى مش واخده باللى لان دول ليهم فضل عليه ومينفعش اتنكر لهم بس اى حد بيتعامل معايا بيتعامل باسلوبى انا ولازم اكون بالنسبه ليه مش اكتر من اخت وزميله

اما اذا حد اعتبرنى اكتر من كده بتجهله واقطع علاقتى بيه فورا ومن غير تردد
وحتى الناس الكبيره فى السن بخلى علاقتى بيهم اسريه
يعنى بدخل بيوتهم واصاحب ستاتهم يمكن اكتر منهم والحمد لله ستاتهم وولادهم بيحبونى وبيثقوا فيه وبكده الى حد ما بضمن انى مخربش بيته لان فى ستات بتغير جدا على اجوازهم وفى نفس الوقت علاقتى بيه بتكون ماشيه فى اطار سليم

يعنى كله فى الاول والاخر متوقف عليكى

تقبلى تحياتى

Dr.Ahmed said...

مع الانفتاح الكبير في بلادنا العربية زادت ظاهرة الاختلاط في المدارس و الجامعات وفي اماكن العمل وفي كل مكان كان..وقد ساعد الاعلام المسموع والمرئي والمقروء كثيراُ علي انتشار هذه الظاهرة بصورة غير مسبوقة ..مع العلم ان الدين له رأي اخر واتذكر قول الله تعالي في خطابه للمؤمنات "وقرن في بيوتكن ولا تبرجن تبرج الجاهلية الاولي "صدق الله العظيم وايضاً قوله"قل للمؤمنين يغضوا من ابصارهم ويحفظوا فروجهم ذلك ازكي لهم ان الله خبير بما يصنعون.وقل للمؤمنات يغضضن من ابصارهن ويحفظن فروجهن "ايا تري سبحانه يأمر بغض البصر ويأذن في الاختلاط والتبرج..ولكن احياناً الضرورات تبيح المحظورات ..فمثلاُ عندما تخرج المراة للعلم ولا تجد غير الجامعة ومابها من اختلاط جم .. فاذا كان نيتها العلم والدراسة من اجل المعرفة فلا حرج في ذلك اما اذا كانت النية هي التعرف علي هذا وذاك والتسلية فقد وقعت في المحظورات والله اعلم ..وهذا ايضاً بالنسبة للمراة العاملة ..فاذا كان العمل ضرورة نتيجة لظروف وضغوط كبيرة المت بها في تلك الحياة الصعبة ..فلا مشكل في ذلك

dr_samarmar said...

سلمى

هو انا خدته على أعصابى؟
ههههههههههههههههههه

ممكن بردو

ياسلمى ماتتصوريش الموضوع دا كان واكل دماغى ازاى

أنا بردو كمان استغربت قولت البت و لا مضت بسلاموكا و لا قالتلى يا سمورة و لا حاجة
و بتتكلم باللغة العربية الفصحى.. خضتينى يا راجل

يعنى ايه متحذلقون بقا ؟ :D

dr_samarmar said...

جنى مجدى

أهو اللى انتى قولتيه دا يا جنى
هو اللى نفسى يكون أسلوب حياتى

بجد دا الصح اللى قلبى حاسه و بيشاورلى عليه

منورانى :)

dr_samarmar said...

دكتر أحمد


متشكرةأوى ع الكومنت و المرور

و اكيد ماقصدش الاختلاط الى هدفه التسلية الحمد لله

أنا أقصد لما الظروف بتحطنى ف موقف محرج و قدامى حد أعرفه.. ينفع أقل ذوقى علشان الاختلاط حرام

عموما كلمة حرام كبيرة أوى و ماينفعش نقولها كدا بسهولة

معرفش لسة :$

تحياتى:)

فشكووول said...

حاضر يا سمرمر بس اما الموضوع ياخد حقه واحضر الحلقه التانيه
تحياتى

dr_samarmar said...

فى انتظارها ان شاء الله ياعمو :)

ستيتة said...

اول زيارة وشكرا لمرورك عندي لأن نفسيتي مش كول خااااالص
افهم يا دكتورة قمر انك لما تقفي في صيدلية أو تفتحي صيدلية أو تكوني مديرة صيدلية انك ها تحطي على وشك منخول؟؟؟؟؟؟؟؟؟؟؟؟؟؟؟؟؟؟؟

انا متأكده ان الموقف واضح جدا جدا طالما انتي محترمة وعارفة حدودك وكمان لا تلاقي من اللي امامك غير احترام في الكلمة والنظرة ده غير انكم واقفين لسبب منطقي زي كل اللي ذكرتيه يبقى بالصلى ع النبي الأجابات واضحة جدا جدا

ولا ناوية تكوني صيدلية من منازلهم ياقمر
مودتي

عالم ماريونت said...

عزيزتي
انا هقولك
وزي ما سمعت من رأي ناس اثق في رأيهم من الناحية الدينية
ان الحياة بتقتضي مننا اننا نتعامل مع الجنس الاخر
يعني في الشغل في الكلية
بس
مفروض نخلص شغلنا وخلاص
منخرجش برة الشغل لأن المشاكل بتبتدي من هنا
في حلقة جميلة جدا لمعز مسعود اسمها العلاقة بين الرجل والمرأة لو تحبي ابعت لك اللينك بتاعها
رنا

وردشان smilyrose said...

الاخت الغالية

تصرفى بطبيعتك

ولكن مع مراعاة ما يمليه علينا

ديننا وشرعيتنا

لان التشدد غير محبب فى ديننا الاسلامى

تعاملى بما ترينه تحت راية الله

وابعدى عن ما يجعلك ترتابين

ولتعلمى ان الفطرة هى اساس التعامل

من منبع القلب والقلب صادق

مع صاحبه

اكرمكى الله حبيبتى

smilyrose

روح الحب الصادق

dr_samarmar said...

ستيتة

بجد رأي حضرتك طمنى جدا جدا

و يارب نفسيتك تتصلح فى أقرب وقت و تبقى فيرى فيرى كوووووول :)

مودتى و احترامى

dr_samarmar said...

رنا

شاكرة جدا لردك اللى بردو طمنى و الله :)

أه لو مفيش ازعاج ممكن تبعتيلى لينك الحلقة ؟

أنا بردو بثق فى رأى معز مسعود أوى

نورتى

dr_samarmar said...

سمايلى روز

و الله جبتى الخلاصة

فعلا الفطرة هى أساس التعامل

و تعرفى ان أنا فطرتى أصلا و طبيعتى انى مش بحب الاختلاط
و مش بكون مرتاحة غير و انا مع بنات فى بنات كدا علشان نكون على حريتنا و نتكلم براحتنا

و لكن لازم انى ماأقلش ذوقى لما أتحط ف موقف محرج مثلا و خلاص اضطريت أقف فى مجموعة فيها حد من الجنس الأخر

و الموقف بينتهى و خلاص


خالص مودتى و احترامى و ميرسى جدا على الزيارة و الرد :)

romansy said...

كونى نفسك
كونى البساطه والحياه
كونى الحب لمنتهاه
كونى مثلما تكونى

استفتى قلبك

فشكووول said...

دكتوره سمرمر تحياتى
فرق السنين ده جه من حساب ابو سيدنا نوح اللى هو ناحور وتارخ مرورا بـ ارفخشذ لما تحسبى عدد سنوات الابهات دى كلها على بعض تلاقى دا الفرق بين سيدنا ابراهيم وسيدنا نوح .. عشان كدا انا قلت ايه الدقه دى كلها .. وهى اعمار تقريبيه لانه لا احد يستطيع ان يحسب هذه الاعمار بالدقه الكافيه .. يعنى ممكن تلاقى فيه انحراف معيارى فى الاعمار دى كلها حوالى 100 او 200 سنه والكلام دا مش من عندى الكلام دا من عند ابن كثير فى قصة سيدنا ابراهيم يعنى اعمار الناس ابهات ابراهيم عليه السلام زى ما كتبت حوالى 3251
سنه واشمعنى يعنى
51
ممكن تبقى 100 ولا 200 ولا اكثر او
اقل .. يا ترى دا واضح ولا لأ .. اذا كان مش واضح اكتبى لى
تحياتى

dr_samarmar said...

رومانسى

ميرسى أوى لمرورك و ردك الجميل

تحياتى :)

dr_samarmar said...

عمو فشكول

أيوة أنا فهمت حضرتك من الأول يا أستاذى فشكول
أنا قصدت بس ان دا حاصل جمع أعمار كوووول الأباء دى .. ب أكيد كل أب منهم ماأنجبش ابنه ف أخر سنة من عمره

يعنى مثلا تارح ماأنجبش سيدنا ابراهيم و عمره 250 سنة بالظبط
و سام ماأنجبش أرفخشد و عمره 600 سنة

بس دا اللى قصدته مش أكتر :)

و متشكرة جدا لاهتمام حضرتك و ردك

Soul.o0o.Whisper said...

سمرمورة


أولا باعتذر على التأخير

ثانيا مش عاوزة أفتى بس أنا قلت اللى سمعته
و مقتنعة بيه
الموقف هو اللى بيحدد

مع التزام اوامر الله


ثالثا : ليكى عندى تاج تعالى خديه






دمتى بود

فشكووول said...

سمرمر .. انتى عندك حق .. جمع الاعمار دى على بعضها افتكاسه من عمك فشكول والرجوع للحق فضيله وانا رايح الشغل الان وبعد العصر او المغرب حصلح المعلومه دى ..
تحياتى

prince4ever said...

سلام عليكم يا د\ سمر
صيدله بقى ايوه يا عم.. احسن ناس الصيادله دول... و على قلبهم فلوس أد كده...يشتغل سنه هنا و بعدين يسافر بره يقعد شهرين و يرجع يتجوز و بعدين شهرين و يرجع يجيب عربيه و بعدين سنه و يشتري طياره و برج و جزيره في الكاريبي...
مش بتوع طب بشري اللي زينا اللي بياخدوا 230جنيه
هه...مبحسدش..انا بقر بس

مممم
محيره نفسك ليه يا ستي... الموضوع بيس خالص...الاختلاط مش حلو..ههههههه..بس كده
ربنا قال ولا يخضعن بالقول فيطمع الذي في قلبه مرض...و بنوته فسرتلك المعنى...تمام..متفقين ان كتير بيختلطوا بس باحترامهم و مش بيدلعوا في الكلام...انا هقولك بس وجهة نظر الجنس الاخر...و اللي انا منهم.."حاسس ان الجنس الاخر ده م المريخ مثلا"... كتير من الشباب و الله مجرد بنت تكلمه وتصبح عليه بيفكر فيها كصديقة و يفكر مع نفسه ازاي يطور العلاقة معاها باي صوره... مبيفكرش كده غير في البنت اللي بتكلمه...حتى لو بتكلمه في الدين مش في دلع ولا كلام فاضي... فمنعا لان حد يفكر في بنت كده ..البنت تنفض و تتنك و متبصش لحد حتى مش تكلمه...
و بعدين الفكره في الاختلاط مش في الوقفه و لا في الكلمه ..الفكره في العواقب و تطور العلاقه ايا كان هذا التطور
انا على فكره مش متشدد خالص بس ده رأيي و الاختلاف في الرأي لا يفسد دماغ عطيه...
بس ريحي دماغك خالص و اعرفي ان مادام حرام و ممنوع يبقى غلط وش كده
ليه الخمره حرام...عشان بتذهب العقل...تؤدي إلى فشل
ليه الاختلاط حرام...عشان فتنة الشيطان للبعض و اللي في قلوبهم مرض...عواقب وخيمه
بس كده
و اخيرا متشكر اوي على زيارتك لمدونتي و رأيك الجميل ده..الف شكر
طولت اوييييييي
سلااااااام

hasona said...

يمكن كما قولتي أن يكون في حدود وفي اطار معين،،،المشكلة أن البعض يستغل الاختلاط بصورة خاطئة تسئ الي الفتاة قبل أن تسئ الي الشاب،،،
و خصوصا في الجامعة
في بعض الاوقات باكون عايز أتكلم مع البعض الذي يسئ الي الجميع
،،،
الاختلاط لمسموح والمقنن يُنشأ جيل يحترم كل جنس الطرف الاخر
ولو نظرتي لكل حالة علي حدة تقدري تاخدي فيها قرار بالسلب أو الايجاب
،،،،
في الدين الامور لا تعلل

تحياتي

dodda said...

عاوزه رد كافى شافى وافى

تابعى قناة الناس
فى فقره للشيخ حازم ابو اسماعيل
ربنا يكرمه
بتتكلم بالتفصيل هن الحيره اللى انت فيها

وانا اسفه جدا ان فى ناس بتقول كلام متناقض جدا فى التعليقات

ارجوكى
لا تسفت قلبك
بينا من العلماء لنفعل
والا ضاع الدين بين القلوب...

صدى الصمت - عاشقة الورد - said...

أنا جيت أرد الزيارة وعجبتنى مدونتك جداً وإن شاء الله هأكون من المتابعين لكِ
وبالنسبة لموضوع البوست وحيرتك فى التعامل مع الجنس الآخر أحب أقولك خليكى على طبيعتك وكونى تلقائية فى تعاملاتك ولكن فى حدود الإحترام والعفة وعدم التجاوز والتعمق فى حاجات شخصية
ونصيحة أخيرة منى لا تتبعى آراء الناس العاديين فى فتوى دينية لأن فى الغالب هتتلخبطى و تتشتتى أكتر لأن الآراء هتتضارب لأن كل واحد بيتكلم من منطلق تجربتة وحياتة الشخصية
تحياتى ... عاشقة الورد

elsha3er said...

السلام عليكم

دايما اهل الاسكندرية كدة يثيروا مواضيع شايكة

بس انا شايف ان الدين ما بيتجزئش وان الاختلاط له حدود يعنى ماحبكتش السلام بالايد ممكن ان اقف مع زمليتى فى حدود الادب يعنى عندنا فى الكلية والله الكلام بيبقى عيب جدا ان ولد يقولو لبنت او العكس بس بيتقال ودة طبعا يعد اختلاط حرام لكن ممكن اسأل عن محاضرة معرفتش اجيبها من حد من صحابى كدة

دة مجرد رأيي

احمد الشاعر

dr_samarmar said...

أنا أسفة أوى انى اتأخرت فى الرد كل دا بس دا و الله علشان الامتحانات

الحمد لله أنا خلاص خلصت و هفضى بقا ان شاء الله :)

dr_samarmar said...

سول

انتى بردو اللى بتعتذرى :$

أنا اللى أسفة انى اتأخرت بس دا بجد و الله علشان كنت فى أوجة الامتحانات :)

أنا بجد خلاص ثبت قرارى و استقريت على انى ألتزم بالأوامر اللى ربنا أمرنى بيها بلا تشدد .. و دا الصح

الاسلام دين الوسطية

أنا من يوم مادخلت عالم التدوين بلاقى ناس بتقول لناس ليكو تاج تعالى خدوه
و من ساعتها بتسائل بينى و بين نفسى... يعنى ايه تاج!!!!
ههههههههههه

دلوقتى حان الوقت انى أسئلك :)

dr_samarmar said...

رامى

يا نهار ألوان احنا هنبتديها قر :)

طيب لما الحكاية كدا مادخلتش صيدلة ليه و شوفت الغلب اللى احنا بنشوفه :(


بالنسبة للموضوع بقا... انت رأى الولاد اللى قولته دا ياهل ترى .. رأى شباب الجامعة بس؟؟؟
و لا أى شاب بيفكر كدا؟
معقول أى شاب بيفكر كدا ؟

و كمان انت قولت و بعدين الفكره في الاختلاط مش في الوقفه و لا في الكلمه ..الفكره في العواقب و تطور العلاقه ايا كان هذا التطور

تفتكر كل بنت هتقبل بتطور العلاقة أيا كان التطور؟؟
و تفتكر أصلا هى كبنت كويسة هتتعامل مع شباب... عايز يطور العلاقة؟

مممممممممممم

و الله منا عارفة بقا

متشكرة ع المرور و الرد

dr_samarmar said...

حسونة

متشكرة أوى ع المرور و الرد

بس فى حاجة مش فاهماها

منين لو نظرت لكل حالة على حدة هقدر أخد فيها قرار بالسلب أو الايجاب
و منين الأمور فى الدين لا تعلل

أنا حاسة ان الجملتين مش زى بعض

لأن لو الأمور فى الدين لا تعلل
و الدين نهى عن الاختلاط تماما... يبقى ماينعش نقول حالة و حالة

لاكن لو الدين بينهى عن بعض عواقب الاختلاط اللى بعض الناس بيقعو فيها
يبقى فعلا هنبص لكل حالة و ناخد قرار

متشكرة أوى للمرور و الرد :)

تحياتى

dr_samarmar said...

دوددة

شكرا على زيارتك الجميلة دى

مش فى حاجات بتكون مش واضحة فى الدين بالظبط؟
يعنى و لا متكلم عنها فى القرأن و لا فى السنة
و بيكون فى خلاف

و ساعتها بنستفت قلوبنا؟؟

و كمان أنا فى حديث قريته مش فاكرة نصه بالظبط لاكن هو فيه ما معناه.. أن الذنب هو ما وقع فى القلب و خشيت أن يطلع عليه الناس

يعنى حسب نيتى من الكلام.. و حسب الموقف جه ازاى .. و كنت مضطرة و لا قاصدة علشان أتسلى مثلا

عموما أنا خلاص فضيت و خلصت امتحانات و هتابع القنوات دى كلها باذن الله
و الله المعين

شكرا على ردك أوى

dr_samarmar said...

عاشقة الورد

نورتينى و هتنورينى و متابعتك للمدونة هتشرفنى :)

الجملة اللى انتى قولتيها دى

وبالنسبة لموضوع البوست وحيرتك فى التعامل مع الجنس الآخر أحب أقولك خليكى على طبيعتك وكونى تلقائية فى تعاملاتك ولكن فى حدود الإحترام والعفة وعدم التجاوز والتعمق فى حاجات شخصية

جميلة أوى و حساها و مصدقاها و مقتنعة انها صح

dr_samarmar said...

أحمد الشاعر

لا كلام عيب ايه و سلام بالايد ايه

انا و الله مش دا الاختلاط اللى بتكلم و بسأل عنه اطلاقا

و أكيد انت فهمت قصدى من قرايتك للبوست

نورتنى :)

marmar said...

بصي يا دكتورة سمورررره
الاختلاط أمر طبيعي جدا جدا
ومن ايام الرسول صلى الله عليه وسلم
وكان في اختلاط والستات بتروح تحارب وتقاتل لانهم كل حاجة عندهم بحدود
وعندنا بردو الاختلاط بحدود يعني منقفش نتكلم مع شباب في الجامعه الا في امور محدده مش نقوله ههيهيهيي شفت يا تموره الي حصل امبارح ولا يا كيمو هيهيهيهيهيهيهي مامي بتقلك كذا وكذا وكذا وتلاقي امها ميتة من سبع سنين لا يا حبيبتي الاختلاط يكون في حدود العقل والاحترام واللي قلبك يحس انه صح لو انتي حسا انك ماشيه صح مش هتضايقي ولا تتلخبطي عشان عارفه انك اللي بتعمليه صح
لكن لو مشيا غلط هتعرفي وتحسي وتقتنعي بأنك لازم تتغيري
والحمدلله انتي ماشيه صح وصح جدا جدا
وخليكي زي ما انتي يا سكرة
تحياتي

dr_samarmar said...

:)

سعيدة يا ريم بردك و زيارتك جدا جدا و يارب تتكرر كتير و ماتكونش الأخيرة :)

تحيات أكبر بكتير :)

leeno said...

ليه متتعامليش مع اللي قدامك بمعايير الانسانية

عامليه على انه انسان بالتجرد عن كونه ذكر او انثى

هل يستحق تحترميه؟؟؟
تثقي فيه؟؟؟
بيحترم فيكي انسانيتك؟؟ بيتعامل معاكي على انك بني ادمة مش انثى؟؟؟

من الضروري انك تعرفي طبيعة الرجل و في دينا مكنش في عزل و اقري التاريخ حتلاقي كتير مواقف حصلت ما بين صحابيات و صحابة و اختلفوا في نقاط و رجعو فيها للرسول عليه أفضل الصلاة و السلام

التعامل ما بين الطرفين ضروري مينفعش نتعامل مع بعض بافتراض ان في مصيبة حتحصل لمجرد اننا كلمنا بعض
دة لوحده بيولد الغلط

انما التعامل على اننا بنحترم انسانية بعض دة منتهى الرقي و النضوج

dr_samarmar said...

لينو

نورتينى بردك و تعليقك جدا :)

يارب تتكرر :)

خالص ودى

محمد سمير said...

الخطلاط ده شيء طبيعى جدا بس لازم يكون فى حدود طبعا
و الحرام بيبان ان هو حرام و الحلال بيبان ان هو حلال و أعملى الى شيفاه صح بس بعد لما تأخذى برأى اناس كتير و و بالاغلبية بقى
طبعا ده بعد رأى الدين