Tuesday 10 February 2009

حاجة تنرفز


دى حاجة كدا كنت كاتباها من فترة ف أحد المنتديات الالكترونية

و لأن نفس الفكرة تساورنى الأن

فقلت أنزله تانى هنا فى المدونة



أكيييييييييد كلكو سمعتو ان المنايفة معندهومش أصل و غدارين

و طالما الانسان اللى قدامك م المنوفية يبقى حرص منه و اعرف انه هيخونك.. سمعتها كتير

مين بقا سمع ان (المصاروة ) القاهريين يعنى بجحييييين و عينهم يندب فيها رصاصة و بيغلطو و يقولو محدش له عندنا حاجة..

أكيد المعلومة دى وصلت للى برة القاهرة

بس أكيد كلكو عارفين ان أهل دمياط بخلة

اللى ماكنتش سمعتها و سمعتها قريب بقا بنات اسكندرية مش محترمين و سفلة و أهل اسكندرية دول مايتناسبوش

انت لو برة اسكندرية أكيد حد حاكالك

زى ما هنا ف مصر قالو ان فى السعودية بيعاملو الحريم زى الجوارى

و زى ما فى البلاد العربية بيقولو مصر مش عرب.. مصر مش مننا .. و المصريين كخة

و زى ماحنا عارفين ان لبنان مقر الانحلال فى الوطن العربى و مليانة...... مزز:D

و زى ما برا بيقولو العرب متخلفين

انتو فاضيين؟ أنا عن نفسى فاضية و هرغى لو وراك حاجة قوم:D

شوية مواقف كدا عاوزة أعرف رأيكم فيها

الأول: كنت عند صاحبتى مامتها بتتكلم عن ناس عاوزين يناسبوهم (بالمناسبة هما م المنصورة) فبتحكى الأم أمامى و تقول:: احنا مستحيل نناسب من اسكندرية احنا داحنا من المنصووووووووووووورة نقوم فى الأخر ناخد ابنها اللى من اسكندرية

ليه بقا ان شاء الله هو أهل اسكندرية دول نكرة و لا ايه.. دا حتى من بحرى و بنحبوه

الثانى:: كنت فى دريم بارك مبسوطة و فرحانة و ف طابور لعبة الشلال أنا و أصحابى لقينا شوية بنات عسولات أوى معانا فى الطابور اللى عمره ما خلص بيتكلمو حبة عربى على حبة فرنساوى بقولها انتى اسمك ايه يا حلوة ؟ (طبعا مع الابتسامة الرقيقة) قالتلى اسمى كذا و هى مكلضمة سألتها انتى منين؟ قالتلى م الجزائر قولتلها بجد و بكل براءة قلتلها نورتو مصر.,. و عجبتك مصر يا حبيبتى..

و انطلق شلال الشتائم اذ فجأة من البنت و و الله العظيم تلاتة ما بهول هوا دا اللى حصل بجد فعلا قعدت تشتم و مع اللهجة الجزائرية بقا ماأقولكش احنا عندنا فى الجزاير بنكره المصريين انتم مش عرب العرب بيكرهوكم انتم مش بتحبونا احنا العرب.. برقت بكل شر:D و قولتلها طب ما بردو احنا عرب

و عينك ماتشوف الا النور بقا لاااااااااااا انتم ............... تييييييييييييييييييييييت فى كلام عيب اتقال

و سلملى ع المترو

الثالث: مدرس الكيميا جاتله طالبة عاوزة تاخد عنده قال لأ مش واخدها.. ليه يا مستر؟ أصلها م المنوفية.. و الله حصلت قدامى :(

تفتكرو ينفع نحكم على حد من غير مانجربه ف موقف و اتنين و تلاتة ينفع نقول فلان دا فيه كذا عشان م الحتة الفلانية أنا بجد مش فاهمة ازاى حتى الأن فى ناس بتفكر كدا... ازاى مانتعاملش مع اللى قدامنا و نشوف أفكاره و أراءه قبل مانحكم عليه لمجرد انه ف جماعة مشهور عنها من قديم الأزل ان فيهم صفة معينة وحشة الموضوع دا منرفزنى أوى بجد أنا بتعصب لما بسمع أى تعليق زى دا عمرك سمعت حد أفكاره كدا؟ و لو ماسمعتش شعورك ايه بعد ما قريت البوست؟؟
مش فاهمة ازاى لسة فى ناس بتفكر بالعنصرية و التعصب دول !!!!

47 comments:

Unknown said...

المنايفة والإسكندرانية والمصاروة والمنصوريين وووووو وهلم جر كلهم أبناء مصر الحبية كلهم اخوات ده المفروض مينفعش أقول على ده بخيل وده سافل وده ميتناسبش وده ابن ستين في سبعين ولا حتى على الناس الي في دول تانية الحكم مينفعش يوكن غر بعد معاملة وعشرة لكن تطلع موضه ان أهل البلد الفلانية كذا وكذا ده اسمه تهريج وهبل وبعدين لازم الي بيشتم في أهل بلد ياخد في باله حاجة ووالله العظيم حقيقة مش كدب لو أنا قلت مثلا بنات اسكندرية سفلة هيجوا كلهم متعلقين في رقبتي يوم القيامة وكله عاوز يقتص مكني وياخد حقي ماهو ربنا مش بيسيب حق حد ولا ايه
وبعدين مالهم بنا اسكندرية قمرات والله اصمله عليهم كل بنات مصر تاج على راسنا يا ناس بلاش نرجع للجاهلية تاني
مودتي لكي أختي

marmar said...

بصي انا هفهمك حاجة
احيانا بتقابلي ناس كتيره اوي وتعرفي عنهم انهم مش كويسين وناس كتير اوي اتخدعت فيهم وفي اخلاقهم ويطلعوا من المكان الفلاني فبنقول كلنا بقى ونجتمع انهم كل اهل المنطقه دي مش كويسه وبنحكم عليهم
يمكن كلامنا في نوع من الصح شوية بس اغلبته غلط لان صوابع ايدك مش زي بعضها كل مكان على وجه الارض هتلاقي في الكويس جدا والي مش كويس جدا
متتنرفزيش بقى يا سمورة
احنا كلنا مصريين من دم واحد واللي مش عاجبهم مصر دول جايين ليه انشالله عشان دريم بارك بس !! مظنش انهم يعتبروا بني ادمين زينا لو بيقولوا كده على مصر لان مصر الدوله الوحيده ال اتذكرت في القران
خليههم يموتوا بكيدهم
تحياتي

promise is promise said...

السلام عليكم
ازيك يادكتوره عامله ايه
اهم حاجه فى التوبيك انك ماجبتيش سيره الصعايده كنت هزعل قوى
ههههههههههههههههه
فعلا مشكله ان الواحد يحكم على حد من اول موقف ممكن يكون الانسان فى الوقت ده فى موقف معينه خلاه يظهر معاكى بشكل مش لائق وتجى نبنى فكره عنه اكيد مش هتكون كويسه
وفى ناس تانى بتقول
first imprestion even last
بس والله مش فى كل المواقف
ياترى بقا ماسمعتيش حد قال حاجه على الصعايده
ههههههههههههه
على فكره شكرا على التاجيد تم الاجابه عنه
ويالا سلام

Anonymous said...

كل مكان فى الحلو واللى مش حلو


لخصت فانجزت

بس خلاص

Anonymous said...

طبعا اسفة علي تأخيرى في الرد
بس انتي عندك حق مش ينفع نحكم علي حد من غير ما نتعامل معاة
وبعدين انا لية حد معرفة من المنوفية
واللةالعظيم اخر كرم واحترام مافيش مرة نروح عندهم غير ما يقومو بالواجب علي اكمل وجة
دة لو حد عندي مش هعمل زيهم طبعا انا بقوم بالواجب مع الناس كلها
بس هما بحس انهم اوفر اوي
اما السكندرين انا زيك كنت اسمع انهم ما يتعشروش بس بعد اما عشرتهم لقيتهم ناس في منتهي الاحترام والكرم
معلش طولت عليكي بس كنت عايزة اعرفك رأيي بما اني اتعاملت معاهم

محمد سمير said...

شوفى بقى برعم من اننا زعلنين مع بعض فى البيت
الا ان انا هقول راى بصراحة
كل مكان فى الحلو و الوحش و المفروض ان احنا عرب نخاف على بعض و ندافع عن بعض فى غياب الاخر


و الاسكندرنية اجدع ناس و كذالك المنوفية و فى كل دول العرب
و يا رب نكون امة متوحدة موحدة و يرجع عهد الاسلام بعد هذا الدمار الاخوى

عايش... ولكن !!!! said...

هههه تعرفى ان الموضوع ده بيعدى عليا كتير وبالزات المنايفه
على فكره اتعاملت معاهم كتير وهما نفسهم بيقولوا كده على نفسهم وفخورين بده
المهم موضوع ان حد يحكم على حد من غير ما يعامله ده منتشر جدا بس فى الغالب لما بيعامله بيعرف انه كان غلطان

dodda said...

:)
وبتوع بورسعيد لما تقوليلهم شكرا او ميرسى مش بيردوا ابدا

ازاى تنسى الصعايده مشهورين بايه؟؟؟

ههههههه
انا بقى يختشى من طنطا بلد الاونطه

وزمان بجد كان الكلام ده يطلع من باب ان الناس فاضيه وبتتكلم
اما دلوقتى بقت حاجه وحشه اوى
ولكن احنا كده
"هكذا وجدنا ابائنا فاعلين"
والعشره فى الاول والاخر هى اللى تحكم

مسدس صغير said...

الشاب اللى من المنصورة طبعا مينفعش يتجوز من اسكندرية هما مش عارفين هو منين وهما منين .. المنصورة يا ناس.. عروس البحر الاحمر وباريس القناة.. انتى بتهرجى وللا ايه يا دكتورة؟؟ ايش جاب لجاب.ههههههههه

dr_samarmar said...

كاتب مصرى

حضرتك أضفت اضافة مهمة أوى أوى
و هى ذنب الناس دى
هو كدا فعلا بيغتاب مجتمع بحاله و شعب كامل

أشكرك على ردك الجميل

dr_samarmar said...

ريم

شكرا ع الرد يا جميل :)

أيوة بالظبط
افرضى مثلا ان فعلا.. معظم اللى من كفر الشيخ مثلا مثلا.. بتوع مصلحتهم

دا بيعمل انطباع مبدئى جوانا أه و بيخلينا مستعدين لتثبيت الفكرة دى لكن دا مش معناه اننا نحطها كقاعدة عامة
ربنا يهدى الكل

dr_samarmar said...

بروميس

العفو يا جميل و ميرسى ع الاجابة :)

هو موضوع الانطباع الأول فعلا كمان مش بيكون صحيح فى بعض المواقف

لازم نستنى كتير قبل ماندى القرار النهائى ف أى شخص

بالنسبة للصعايدة أكيد عارفة اللى بيتقال
هههههههههههههههه

بس و الله لما اتعاملت مع صعايدة لقيتهم أجدع ناس و عند كلمتهم كدا

اللى بتتكلم عليهم كدا هما اللى هبل :)

dr_samarmar said...

اسماء و أحلام فى وجدانى

بس مين اللى يسمع بقا

شكراااا :)

dr_samarmar said...

gogo!sf

نورتينى

و شكرا ع الرد الجميل و الصح :)

dr_samarmar said...

محمد

شكرا ع الرد

dr_samarmar said...

عايش و لكن

هههههههههههههه و فرحانين بدا :D
و فخورين بيه

على أى أساس :D

منور :)

dr_samarmar said...

دوددا

شيللاه يا سيد يا بدوى
ههههههههههههه

أجدع ناس

بلد المشبك و الحلاوة السمسمية :)

dr_samarmar said...

مسدس

تؤتؤتؤتؤتؤتؤتؤتؤ

ليه بس كداااااااااا

بص انا مش عارفة بتتكلم جد و لا بتهزر

لو بتتكلم جد شوف رد المدونين اللى كتبو قبلك كلهم و حاول تقتنع بيه :$

ميرسى ع الرد :$

فكرة من الزمن ده said...

تعرفي البوست بتاعك ده فكرني بايه
واحدة قابلتها لاول مرة مع صديقة ليا
واول ما شافتني قالتلي ازيك انتي امورة منين؟ قلت لها انا اسكندرانية
والله والله على طول فيي وشي راحت قايلة لي الاسكندرانية مية مالحة ووشوش كالحة كنت اول مرة اسمع التعبير ده واتصدم بيه
وطبعا الصديقة المشتركة حبت تلطف الجو دون جدوى طبعا
والغريب انها اديتني كتف وخدت مني جمب وموقف وهي كانت مرحبة بيا من البداية يعني لا شافت مني شيء يدايقها او كرهتني لعرفت اني اسكندرانية
تكونش كان نفسها تطلع اسكندرانية ومعرفتش ده التحليل الوحيد اللي اتوصلت له
شكرا على الموضوع الذيذ ده ومعلش اني طولت عليكي

dr_samarmar said...

سبحان الله

دى انسانة غريبة
أوى :D

ربنا يهدى الجميع

ميرسى يا جميل ع الرد

نورتينى

صدى الصمت - عاشقة الورد - said...

معلش يا سمورة ماتتنرفزيس ولا حاجة مافيش رأى ممكن يتفق علية كل الناس لازم هتلاقى حد مش عاجبة وحد معترض وحد مؤيد وحد محايد وطبيعى ان البشر تفكيرها مختلف ومش كل الناس بتحكم على الشخص من جنسيتة أو محافظتة
وأنا أعرف ناس كتير منايفة ودمايطة وإسكندرانية جدعان قوى قوى
تحياتى

yoyo said...

اممممممم
امال بقى الطنطاوية و مدد يا سيد يا بدوى مدد هههههههههههههههههه
و طنطا بلد الاونطة

احنا بشيل ذنب اشياء مش ارتكبنها و لا حتى عاصرنها و المشكلة انها بتكون علامة وحكم بالمظهر من غير حتى ما تعاشرى الانسان دا يعنى انا اعرف ناس كتير من المونوفية وبجد ناس اخلاق و ذوق جدا ولا اى كلام من اللى بسمعه عنهم و كمثل الصعايدة اللى مظلومين فى كل النكت
الامثال كتيرة اوى

بوست جميل و ناقش موضوع احنا بالفعل بنعانى منه

تقبلى مرورى فى اولى زياراتى وانشاء الله يدوم بينا التواصل

اشكرك لمرورك على مدونتى
تحياتى
يويو

dr_samarmar said...

صدى الصمت

لا لا أنا متنرفزة :D

أكيد مش كل الناس بتفكر كدا بس صدقينى نسبتهم بقت كبيرة أوى معرفش ليه

مش بس حكاية التريقة و التعصب من أهل محافظة للتانية

لا و كمان بين الدول و بعضها

ياريتنا نتجمع بقا و نبطل الأسلوب الرجعى دا فى التفكير و الله

منورانى :)

dr_samarmar said...

يويو

متشكرة يا يويو على رأيك الجميل
و على زيارتك اللى أسعدتنى و شرفتنى

و ياريت و الله كلنا نحاول ننصح أى حد بيفكر كداو ننقده ف وشه عشان يبطل عنصرية

تحياتى :)

Sweet Violet said...

اللى بيفكر كده للأسف ماشى بمبدأ السيئة تعم والحسنة تخص

بس اعتقد ان الناس الكبار بس هما اللى كده

اما دلوقتى الشباب التفكير اختلف شويه

انا ليا اصحاب كتير من محافظات مختلفة و من بر مصر كمان

بس الصراحه ماسمتعش قبل كده العنصريه الجامده دى

الا من الناس الكبار .. وطبعا بنحاول على قد مانقدر اننا نقولهم ان مش كله زى بعضه

تحياتى ياقمر وبلاش تضايقى نفسك

(:

و بجد سعيده جدااا لزيارتك و اتمنى التواصل الدائم

dr_samarmar said...

ضد التيار

بس عارفة.. أنا و الله العظيم شفت و اتعاملت مع ناس صغيرين أخرهم يعنى 25 سنة و بيفكرو بنفس الأسلوب بجد

بس فعلا هما أقل كتير من الكبار اللى بيفكرو بالأسلوب دا

منورانى و الله العظيم :)

أية الشقية الشعنونة said...

اولا بطلب منك طلب خاص تكبرى الخط شوية
اوك

ثانيا عنهم حق يبنتى منتى اهو من اسكندرية ومسمية نفسك سمرمر

دلع ده ولا مش دلع ؟؟
ردى عليا
جاوبينى

هههههههههههههههههه

يبنتى والله فعلا حاجة غريبة
أنا ليا أصحاب منايفة جدعان جدا والله
وأخويا كمان كان بيدرس برة السويس واكتر ناس كانوا بيقفوا جنبه المنايفة

وبعدين اللى بتقول احنا من المنصورة ناخد من اسكندرية دى تقعد على جنب
المنصورة بردو عندنا بيتقال عليها
تييييييييييييييييت

غباء طبعا كل حد على ما اتربى فى بيته واهله اولا
وحسب طبيعته وتفكيره ثانيا
غير كده يبقا ظلم وتزمت

تحياتى
سلام عليكم

بنوتة said...

هههههه
موضوعك جميل جدا بس أول مرة أعرف اننا بيتقال عننا بجحيين ويندب في عنينا رصاصة
الله يسامحهم
بس للاسف فعلا مفيش تجانس بين سكان مصر كل جهة عايشة مع نفسها
تحياتى ليكى

mo5tar said...

ممممممم

يعنى حاجه وحشة جداً حكاية التمييز العنصرى ده

والمفروض انها متكنوش بينا خالص

بمعنى اننا شعب واحد ... امة وحدة ... كلنا بشر

بس فى حاجه بتقولكـ الانطباع الاول يدوم

للاسف يعنى

بس اكيد الانظباع ده بيزول مع المعاملة

نصيحة بقى متبقاش تسأل حد انتا منين

ههههههههههههه

وطبعاً طبعاً


معروف عن الشراقوة الكرامـ

ههههههههههههه

الزيارة الاولى

تحياتى

:D

فشكووول said...

ماشى يا سمرمر .. آه يا راسى .. اصل انا منوفى والخبطه وجعتنى على راسى .. ماشى يا سمرمر .. حاشيلها لك .. مش انا منوفى بقى
تحياتى يا سمرمر

محمد الدخاخنى said...

بدايةً: الموضوع رائع وللمرة الأولى يطرح أمامى

وأنا من الأشخاص الذين يكثرون من كلمة"حيثما تجد المصلح تجد المفسد أو العكس"

ولا يجب علينا أن نحكم على الأشخاص من بلادهم أو جنسيتهم

وبالمناسبة أنا"صعيدى" ترى ماذا يقول الناس علينا"طبعاً نكت بالهبللللل"

تحياتى لك

أميرة الجنة said...

السلام عليكم
ازيك يا احلى دكتورة انا طبعا مش مع الناس دى لان فيه فى كل مكان ناس حلوة وناس وحشة وفيه خير وفى شر يعنى مش معنى كده ان احنا نحكم عالواحد بمجرد انه من مكان معين وفعلا هى حاجة تنرفز موووووووووووووووت ولو عاملنا الناس بطيبة وحب هنعيش تمام وزى الفل
مدونتك روووووووووووووووووعة وان شاء اله مش هتكون الزيارة الاخيرة
دمتى مبسوطة ومش متنرفزة

شيماء جمال(شيمو القمر) said...

عندك حق فعلا إلى حد ما
بس أنا اللى عرفته لما عاشرت نس كتير بسبب دراستى من كل أقاليم مصر
ولقيت عندك حق فى حاجات كتير بس كل بلد فيها الحلو وفيها الوحش
يمكن بتبقى طريقة حياتهم غيرنا فكل واحد بيستغرب حياة التانى
وده السبب مش أكتر
تحياتى

Soul.o0o.Whisper said...

سمرموووورة


أولا أنا يادوب قرأت التاج
:)

و كدا هى دى جايزتى
تاج اكسكلوسف
هههههههههههههههه

ماشى يا ستى أى حاجة منك حلوة


هأقرأ بئا البوست دا و أجيلك




سلام مؤقت

Soul.o0o.Whisper said...

قرأت البوست يا قمر


و فعلا أكبر غلط إننا نحكم على شخص أو كيان من غير ما نشوفه


و كمان موقف الجزائرية دا وحش اوى
من الطرفين يعنى مش من واحد

المهم



بجد احلى حاجة قرأتها
إن سبب أكثر المشاكل اللى بنعيشها
إننا عاوزين الحريات اللى اعطهالنا عصر التقدم
مع العيش بعقلية العصر القديم

و بالتالى لاحنا منتمين للعصر القديم و لا الحديث






خالص تحياتى يا جميل

عمرو جويلى said...

السلام عليكم
شرفت بزيارة مدونتك لأول مرة .
وصعقت عندما قرأت موضوع المنيايفة لأنى منوفى وأعتز بذلك.
أختى الكريمة:ليس معنى أنك تقابلت مع شخص لا يعجبك تصرفاته فتحكمى على الكل بذلك
تقبلى تحياتى
ويسعدنى التواصل معك

elsha3er said...

السلام عليكم

اولا انا بكره اهل المنوفية مش عشان هما خاينين وكدة

لا عشان محتلين البلد بقلهم كتيررررررررررررررر

اما عن المصاروة فوالله احنا الاسكندرانية بالنسبة لينا عادى

واكيد احنا بنتشتم عادى والله اهل اسكندرية دول غلابة

اما بقى عن الشتايم اللى سمعتيها من ممثلى الجزائر فى مصر

فا دة عادى لان اى دولة عربية بيكرهو المصريين جدا وما تسأليش لية لان انا مش عارف

ولو لاحظتى فى ماتش كورة ولا حاجة لو كسبنا يضربونا

ليبيا والمغرب وتونس والجزائر

والله اعلم

تحياتى لاحلى ناس فى الاسكندرية

احمد الشاعر

dr_samarmar said...

أية

حاضر و الله هكبره ان شاء الله

حالا هعمل تعديل للبوست اللى بعد دا علشان خاطر عيونك :)

أنا بدلع .. هههههههههه

ماشى ماشى :)

هو زى ماقولتى اللى بيتقال دا كله بجد غباااء :)

dr_samarmar said...

بنوتة

مش عارفة ليه مفتقدين التجانس دا مع ان دلوقتى فى نت و فضائيات و كل واحد بقا بيظهر أراءه و ثقافته ف منتهى الحرية

يمكن ضد التيار عندها حق
الكبار هما اللى بيكونو متعصبين كدا

الشباب الصغير بقا بيتعامل دلوقتى مع كل الفئات
و فهم اللعبة :)

dr_samarmar said...

مختاار

أيوة أيوة مين قدكم

سمعتكو حلوة انكم كرماء جدا

منور :)

dr_samarmar said...

عمو فشكوووووووووووول

يا خبر يا خبر يا خبر

أنا أسفة جدا جدااااااا يا أستاذى و النبى ماتشيلهالى

أنا وا لله بزعق للى بيقولو كدا كلهم و بخليهم يقولو حقى برقبتى

و الله باخد حقكم تالت و متلت :)

dr_samarmar said...

محمد الدخاخنى

و الله الصعايدة دول من أحسن الناس و الفئات كلهم شهامة و كرم و جدعنة

و كل النكت دى استخفاف دم و ناس فاضية مش لاقية حاجة تعملها:(

تحياتى

dr_samarmar said...

أميرة الجنة

متشكرة جدا جدا يا أميرة على مرورك و زيارتك
و ان شاء الله يدوم التواصل بيننا

و أنا بعد ردودكم و الله مابقتش متنرفزة :)
نورتى:)

dr_samarmar said...

اعترافات قلب

أكيد زى ماقولتى

علشان أسلوب الحياة و التعامل مختلفين شويتين

بنقلب على بعض :$

منورانى :)

dr_samarmar said...

سووووووووول


بجد احلى حاجة قرأتها
إن سبب أكثر المشاكل اللى بنعيشها
إننا عاوزين الحريات اللى اعطهالنا عصر التقدم
مع العيش بعقلية العصر القديم


الله عليكى

هو دا

بندور ع الحاجة و نفكر و نتعامل بعكسها

منورة يا جميييل و التاج قريب ان شاء الله :)

dr_samarmar said...

اللؤلؤة

أسفة لو كان الكلام اللى فى البوست جامد شوية

بس أنا بنقل وجهة نظر بعض الأغبياء.. و بنتقدها :)

منور البلوج

dr_samarmar said...

الشاعر

مممممممم أيون أيون فهمتك

بس هما ذنبهم ايه بس
هما نفسهم زعلانين م الاحتلال دا :)

بس تفتكر ممكن يكون ايه سبب كره بقية البلاد العربيين لينا

دول بيعتبرونا مش منهم :$